ლივერპულის თავდამსხმელი უგო ეკიტიკე გულშემატკივრებს დაპირდა, რომ მათგან ძალას მიიღებს იმ რთულ პერიოდში, რომელიც მას აქილევსის მყესის გაწყვეტის გამო ელის. ამ ტრავმის გამო ფეხბურთელი მსოფლიო ჩემპიონატს გამოტოვებს.
23 წლის ფორვარდმა მომხდარს უსამართლობა უწოდა, თუმცა ენფილდის ერთგული ქომაგების მხარდაჭერისთვის მადლიერება გამოხატა. ეკიტიკემ მძიმე დაზიანება სამშაბათს, ჩემპიონთა ლიგაზე პსჟ-სთან მატჩისას მიიღო, რის გამოც მოედანი 31-ე წუთზე საკაცით დატოვა. სკანირებამ დაადასტურა, რომ სეზონი მისთვის დასრულებულია და ის საფრანგეთის ნაკრებს მუნდიალზე ვერ დაეხმარება.
დადასტურებულია: უგო ეკიტიკე მუნდიალზე ვერ ითამაშებს
სოციალურ ქსელ X-ზე ეკიტიკემ ემოციური პოსტი გამოაქვეყნა: „რთულია, შესაძლოა უსამართლოც, მაგრამ მადლობელი ვარ, რომ ეს თქვენთან ერთად გადამხდა. მე მარტო არ ვარ. თქვენი ძალა და სიყვარული ჩემი მამოძრავებელი ენერგია იქნება. მალე შევხვდებით, ენფილდო“.
კლუბმა ასევე გაავრცელა ოფიციალური განცხადება: „ლივერპული ადასტურებს, რომ უგო ეკიტიკემ აქილევსის მყესი გაიწყვიტა. ის გამოტოვებს მიმდინარე სეზონის დარჩენილ ნაწილს და მსოფლიო ჩემპიონატს. უგო კლუბისგან სრულ მხარდაჭერას მიიღებს“.
ეკიტიკე მიმდინარე სეზონში მერსისაიდელთა საკვანძო ფეხბურთელი იყო. ტრავმამდე მან ყველა ტურნირზე 17 გოლის გატანა მოასწრო.
