2026 წლის მსოფლიო ჩემპიონატზე ბრაზილიის მორიგი კატასტროფის შემდეგ, ნეიმარ და სილვამ ეროვნულ ნაკრებში კარიერის დასრულების შესახებ ოფიციალურად განაცხადა.
სანტოსის 34 წლის თავდამსხმელმა გადაწყვეტილება ნორვეგიასთან მერვედფინალში 2:1 მარცხისა და ტურნირიდან გამოთიშვის შემდეგ მიიღო.
ჩრდილოეთ ამერიკაში გამართულ მუნდიალზე ნეიმარი არასრულფასოვან ფიზიკურ ფორმაში ჩავიდა. მან მხოლოდ ორ მატჩში მიიღო მონაწილეობა, ხოლო თავისი ერთადერთი გოლი სწორედ ნორვეგიასთან შეხვედრაში, პენალტის ნიშნულიდან გაიტანა. 2002 წლის შემდეგ სამხრეთამერიკული გრანდი ნატრულ ტიტულს კვლავ უშედეგოდ გამოეთიშა.
პრესკონფერენციაზე ჟურნალისტის კითხვას, ითამაშებდა თუ არა 2030 წლის მსოფლიო ჩემპიონატზე, ნეიმარმა პირდაპირ უპასუხა:
ჩემი თავგადასავალი ნაკრებში დასრულდა. მე იქ ისტორია დავწერე და ამით ძალიან ბედნიერი ვარ. ბევრი რამ გადავიტანე, ყოველთვის ბოლომდე ვიბრძოდი ამ ყვითელი მაისურისთვის, თუმცა ვფიქრობ, რომ ეს უკვე საკმარისია
ნეიმარს სანტოსთან მოქმედი კონტრაქტი 2026 წლის ბოლომდე აკავშირებს, რის შემდეგაც თავის მომავალს გადაწყვეტს. ის ბრაზილიის ნაკრების ისტორიაში საუკეთესო ბომბარდირის სტატუსით მიდის - 130 ჩატარებულ მატჩში გატანილი 80 გოლითა და 4 მუნდიალზე ასპარეზობის გამოცდილებით.
