ნეიმარი ისევ ყურადღების ცენტრშია და ამჯერადაც სკანდალური მიზეზით.
ბრაზილიელმა ვარსკვლავმა კრიტიკოსებს, რომლებიც მას პოკერის თამაშის გამო ესხმოდნენ თავს, მოედანზე იდეალურად უპასუხა. შაპეკოენსეს წინააღმდეგ (2:2) სანტოსის მაისურით ნეიმარმა დუბლი შეასრულა და გუნდი მარცხისგან იხსნა.
განსაკუთრებული აღმოჩნდა მისი პირველი გოლის აღნიშვნა: ბრაზილიელმა პოკერის ბანქოს დარიგების იმიტაცია გააკეთა და ამით კრიტიკოსებს პირდაპირ დასცინა. მოგვიანებით კი, მატჩის მიწურულს, პენალტი ზუსტად გამოიყენა და სანტოსს მნიშვნელოვანი ქულა მოუტანა.
შეგახსენებთ, რომ ნეიმარი სერიოზული კრიტიკის ქარცეცხლში მას შემდეგ გაეხვა, რაც სანტოსის ერთ-ერთი მატჩი გამოტოვა და იმავე პერიოდში პოკერის ტურნირზე შენიშნეს. თავად ფეხბურთელი ბრალდებებს კატეგორიულად უარყოფს და აცხადებს, რომ ტურნირზე დასვენების დღეს, კლუბთან სრული შეთანხმებით წავიდა.
ხალხი გამუდმებით იმაზე ლაპარაკობს, რომ პოკერს ვთამაშობ. მე დილის ვარჯიში სრულად შევასრულე. თამაშზე არ წავედი, რადგან ვარჯიში ახალი განახლებული მქონდა, მეორე დღეს კი ოფიციალური დასვენება მეკუთვნოდა
ფეხბურთელი ხაზს უსვამს, რომ სანტოსის სარეაბილიტაციო და სავარჯიშო გეგმას ზედმიწევნით მიჰყვება და პოკერის ტურნირზე დასწრებაში პრობლემას ვერ ხედავს. ამჟამად სანტოსი ბრაზილიის ჩემპიონატში მეთოთხმეტე ადგილზეა.
ნეიმარის გუნდს მომდევნო გამოცდა ოთხშაბათს, კოპა სუდამერიკანაზე, უნივერსიდად სენტრალის წინააღმდეგ ელის.
