დანიის ნაკრების ექიმმა, მორტენ ბოესენმა კრისტიან ერიქსენის ჯანმრთელობის მდგომარეობის შესახებ ისაუბრა, რომელმაც უკრაინასთან ამხანაგური მატჩის დროს გონება დაკარგა.
ვოლფსბურგის ნახევარმცველი მეორე ტაიმში მინდორზე დაეცა, მას მოედანზე სამედიცინო დახმარებას დიდხანს უწევდნენ. საბოლოოდ, ერიქსენი გონს მოვიდა და ფეხზე წამოდგომა შეძლო, თუმცა მატჩი ბოლომდე არ დასრულებულა.
„კრისტიანი თავს კარგად გრძნობს და მოედანი დამოუკიდებლად დატოვა. ჩემი აზრით, კარდიოსტიმულატორმა გამართულად იმუშავა.
მან გონება მცირე ხნით დაკარგა, მაგრამ ძალიან სწრაფად მოვიდა აზრზე და დახმარებაც ოპერატიულად აღმოვუჩინეთ. ახლა ის საავადმყოფოში დამატებით შემოწმებას გაივლის, რათა მომხდარის მიზეზი დადგინდეს. მასთან და ექიმებთან მუდმივ კავშირზე ვართ.
მაგრამ კრისტიანი კარგად არის, მან მთხოვა მისი მოკითხვა გადამეცა ყველა ფეხბურთელისთვის და მეთქვა, რომ ყველაფერი წესრიგშია“, - განაცხადა ბოესენმა.
2021 წელს ერიქსენმა ფინეთთან ევროპის ჩემპიონატის მატჩისას (0:1) გულის გაჩერება გადაიტანა. მოგვიანებით მას გულის რიტმის კონტროლისთვის კარდიოვერტერ-დეფიბრილატორი (ICD) ჩაუდგეს.
