ორიდან ორი დანიასთან - საქართველო საკვალიფიკაციო ეტაპის შემდეგ რაუნდშია!

2027 წლის მსოფლიო ჩემპიონატის საკვალიფიკაციო ეტაპის მატჩში საქართველოს საკალათბურთო ნაკრებმა თბილისი არენაზე დანია მიიღო.

რამდენიმე დღის წინ დანიაში მოგებული შეხვედრის შემდეგ, ჯიკიჩის გუნდისთვის ამ თამაშშიც აუცილებლად სჭირდებოდა გამარჯვება.

საქართველომ პირველი მეოთხედი 4-ქულიანი უპირატესობით მოიგო, მეორე მეოთხედში კი სხვაობა კიდევ 8 ქულით გაზარდა და საბოლოოდ შესვენებაზე ანგარიშით 43-31 გავიდა. მეორე ტაიმში ქართველებმა მატჩი დამაჯერებლად მიიყვანეს ბოლომდე და ჯამში 29-ქულიანი სხვაობით 89-60 იმარჯვეს.

საქართველოს ნაკრებს ახალწვეულმა ნატურალიზებულმა მოთამაშე მარკის რიდმა და კაპიტანმა თორნიკე შენგელიამ ულიდერეს.

დებიუტანტი ამერიკელის ანგარიშზე 29 ქულა, 3 მოხსნა და 7 შედეგიანი გადაცემა იყო. მან 14-დან 12 ორქულიანი და 3-დან 2 საჯარიმო ჩააგდო. თორნიკე შენგელიამ კი 27 ქულა, 11 მოხსნა და 3 შედეგიანი გადაცემა მიითვალა. კაპიტანმა 11-დან 7 ორქულიანი და 8-დან 7 საჯარიმო შეასრულა ზუსტად.

დანიური მატჩის მსგავსად გამოსარჩევია ალექს მერკვილაძის სტატისტიკაც, რომელმაც 12 ქულა და 8 მოხსნა ჩაიწერა აქტივში და 3-დან 3 სამქულიანი ჩააგდო. ორი მატჩის ჯამში კი მის ანგარიშზე 7-დან 7 ზუსტი სამქულიანი იყო.

საქართველოს ნაკრებს საკვალიფიკაციო ჯგუფში 4-დან 2 მოგება აქვს და ამ მომენტისთვის ჯგუფში მე-2 ადგილზეა, რაც იმას ნიშნავს, რომ გუნდმა მე-2 საკვალიფიკაციო ეტაპზე გასვლა ოფიციალურად გაინაღდა, შესაბამისად მსოფლიო ჩემპიონატის საგზურისთვის ბრძოლა გრძელდება.

მომდევნო მატჩს ჯიკიჩის გუნდი ამ ჯგუფის ფარგლებში უკრაინასთან 2 ივლისს გამართავს.