შოტლანდიის ბანკმა წარმოადგინა შეზღუდული რაოდენობის 20-ფუნტიანი ბანკნოტი, რომელზეც გამოსახულია სკოტ მაკტომინეის დაუვიწყარი მაკრატელა დარტყმა. პროექტი შოტლანდიის ნაკრების მსოფლიო ჩემპიონატზე დაბრუნებას ეძღვნება და გულშემატკივრებს უახლოეს კვირებში ამ უნიკალური კუპიურიდან ერთ-ერთის (სულ 100 ცალი დაიბეჭდა) მოგების შანსი ექნებათ.
დიზაინი ჰარმონიულად აერთიანებს ტრადიციული ბანკნოტის ელემენტებს იმ კადრებთან, რომლებიც პირდაპირ მიუთითებს მაკტომინეის უმნიშვნელოვანეს გოლზე დანიის ნაკრების წინააღმდეგ, მსოფლიო ჩემპიონატის საკვალიფიკაციო ეტაპზე.
ეს ისტორიული მომენტი შარშან ნოემბერში, გლაზგოში, ჰემპდენ პარკზე შედგა, როდესაც შოტლანდიამ დანია დრამატულ ბრძოლაში 4:2 დაამარცხა და 1998 წლის შემდეგ პირველად მოიპოვა მუნდიალის საგზური. მაკტომინეიმ ანგარიში სწორედ ამ ეპიკური მაკრატელა დარტყმით გახსნა.
მაკტომიეიმ განაცხადა:
მსოფლიო ფეხბურთის უდიდეს სცენაზე გასვლა ყველა ფეხბურთელის ოცნებაა და ვიცი, რომ ეს ჩვენი გულშემატკივრებისთვის ყველაფერს ნიშნავს. მსგავსი მომენტები ყველას ეკუთვნის, ვინც გუნდს მხარს უჭერს, ამიტომ ჩემი გოლის შოტლანდიურ ბანკნოტზე ხილვა საოცრად განსაკუთრებული გრძნობაა.
კიდევ უფრო ამაყი ვარ იმით, რომ შოტლანდიის ბანკთან თანამშრომლობით ეს პროექტი საქველმოქმედო ორგანიზაცია Crisis-ს დაეხმარება უსახლკარობის პრობლემასთან ბრძოლაში.
შოტლანდიის ბანკის აღმასრულებელმა კომიტეტის თავმჯდომარემ, ემა ნოუბლმა ხაზი გაუსვა კუპიურის მნიშვნელობას:
ასეთ დრამატულ სტილში საგზურის მოპოვება არის მომენტი, რომელსაც გულშემატკივრები არასოდეს დაივიწყებენ. სკოტის მაკრატელა დარტყმა უკვე მიიჩნევა ერის ისტორიაში ერთ-ერთ საუკეთესო გოლად. ჩვენთვის პატივი იყო მასთან მუშაობა ამ იდეის გასაცოცხლებლად.
დაბეჭდილი 100-დან 50 ცალი ხელმისაწვდომი იქნება საზოგადოებისთვის კოლექციონერთა აუქციონების, გათამაშებისა და სპეციალური მოძრავი საცავების (pop-up vaults) მეშვეობით. აუქციონიდან და გათამაშებიდან მიღებული შემოსავალი სრულად გადაერიცხება Crisis Scotland-ს, რომელიც უსახლკარო ადამიანების მხარდაჭერაზე მუშაობს.
