ლეო მესი ინტერ მაიამისა და ფილადელფია იუნიონის დღევანდელ მატჩში, რომელიც მესის გუნდმა 6:4 მოიგო, სავარაუდო ტრავმის გამო მოედნიდან ნაადრევად გაიყვანეს.
ლეგენდარული არგენტინელი მაიამის შემადგენლობაში თითქმის ყოველთვის ბოლო წუთამდე თამაშობს და მატჩის მიწურულს, დიდი უპირატესობის დროსაც კი იშვიათად ცვლიან ხოლმე.
ამ შემთხვევაში ყველაფერი სხვაგვარად მოხდა. ამ ორ გუნდს შორის გამართული გიჟური, 10-გოლიანი თრილერი შესაძლოა მესის ტრავმამ გადაფაროს. აღსანიშნავია, რომ მან მოედნის დატოვება თავად ითხოვა.
ჯარიმის შესრულების შემდეგ, მესიმ ფეხის უკანა ნაწილზე მოიკიდა ხელი და მწვრთნელს შეცვლა სთხოვა. ინტერ მაიამის მწვრთნელმა, გილერმო ჰოიოსმა ის მაშინვე გაიყვანა მოედნიდან.
ვინაიდან მსოფლიო ჩემპიონატის დაწყებამდე სულ რამდენიმე კვირაა დარჩენილი, ამ მომენტმა გულშემატკივრები ძლიერ შეაშინა.
მატჩის შემდეგ მწვრთნელმა განაცხადა:
სამედიცინო შტაბის საბოლოო დასკვნა ჯერ კიდევ არ გვაქვს, თუმცა იმ მომენტში ლეო უბრალოდ გადაღლილი იყო. სწორედ ამ გადაღლილობის გამო, ჩვენ არ გვინდოდა რაიმე სახის რისკზე წასვლა.
არგენტინის ნაკრებისა და ზოგადად ფეხბურთის გულშემატკივრები სულგანაბულები ელიან ახალ ამბებს უახლოეს საათებში ლეგენდის ჯანმრთელობის მდგომარეობის შესახებ.
