ლუკა ლაცაბიძე კარიერას დანიაში გააგრძელებს

Geo Team-ის ინფორმაციით, დონეცკის შახტარის 21 წლის ცენტრალური მცველი ლუკა ლაცაბიძე დანიის სუპერლიგაში ითამაშებს.

წყაროს ცნობით, იჯარა 6-თვიანი იქნება, გამოსყიდვის ოფციის გარეშე. გუშინ დღის პირველ მონაკვეთამდე შახტარი და კადისი შეთანხმებასთან ახლოს იყვნენ, თუმცა ტრანსფერი ჩავარდა. ვეილესთან კი ყველაფერი 3 საათში დალაგდა.

დანიურ კლუბს ცენტრალური მცველის პოზიციაზე ფეხბურთელი სჭირდებოდა, შესაბამისად, ყველაფერი მალე გადაწყდა.

ფეხბურთელის აგენტი, ირაკლი ლილუაშვილი შაბათს საფრანგეთში ჩავიდა, მეცში გიორგი ქვილითაიას ტრანსფერი დახურა, გუშინ კადისის შეთანხმება ჩაუვარდა, 3 საათში კი ვეილეში ლუკა ლაცაბიძის ტრანსფერი დახურა და დღეს 21 წლის მცველთან ერთად დანიაში ჩავა.

ცენტრალურ მცველს დანიურ კლუბში კიდევ ერთი ქართველი, გიორგი ტაბატაძე დახვდება, რომელიც ვეილეში გასულ ზაფხულს იბერია 1999-დან გადავიდა.

ლუკა ლაცაბიძე ბოლოს დონეცკის შახტარიდან იჯარის წესით დინამო თბილისში ასპარეზობდა, იქამდე კი ოდესის ჩერნომორეცში თამაშობდა.