იბერია 1999-ის პრეზიდენტმა, ტარიელ ხეჩიკაშვილმა ქართული კლუბების წარმატების მნიშვნელობაზე ისაუბრა.
,,ჩემზე ბედნიერი ადამიანი არ მეგულებოდა დედამიწის ზურგზე, როცა ლარნესთან გავედით, მაყურებელი გვილოცავდა და ჩვენთან ერთად ზეიმობდა. როცა ცუდად ვარ, იმ კადრებს ვრთავ და სხვა ენერგია მეძლევა და მოტივაცია მაქვს, რომ კიდევ უფრო მეტი გავაკეთო.
წარმომიდგენია, ჩვენ ევროპა ლიგაზე ან ჩემპიონთა ლიგაზე რომ გავიდეთ, რა მოხდება საქართველოში. ამის გამო ღირს ცხოვრება, მაგრამ ისიც გავაცნობიერე რამდენად მეტი შრომაა საჭირო, რომ ჩვენ შემდეგი ეტაპი გავიაროთ, მაგრამ ეს აღარაა უკვე შორეული ოცნება. რა თქმა უნდა, ეს უფრო წაადგება ჩვენს გუნდებსაც.
იგივე ბათუმის დინამოსთვის არის ძალიან დიდი სტიმული და იმედია, რომ შეზღუდვები მოეხსნებათ და კიდევ ერთხელ დავადასტურებ, რომ თუ ამის საჭიროება არის, ჩვენ მზად ვართ და დარწმუნებული ვარ, სხვა გუნდებიც შემოგვიერთდებიან, რომ იქნებ ეს გუნდი დაუშვან [ევროტურნირების საკვალიფიკაციო ეტაპზე], რადგან ბათუმელები ამას იმსახურებენ.
იმედია, რომ ყველა სხვა გუნდისთვისაც ასე იქნება. დინამო იქნება ეს თუ რუსთავი, სადაც საფეხბურთო ბუმი დაწყებულია, წესიერი ხალხი მოვიდა და ბევრ კარგ საქმეს აკეთებენ. ქუთაისშიც, გორში და ყველგან რეგიონში.
ასევე გაგრა გავიდა ფინალში [თასის] და როგორც წესი, ისინი ყოველთვის ბრძოლით გამოირჩევიან. თუნდაც გაგრა რომ ევროპაში გამოჩნდეს, რამხელა სახელია ჩვენთვის.
ჩვენ ყველა ერთმანეთს უნდა დავუდგეთ გვერდზე, ეს [ევროტურნირებზე წარმატება] მათთვის დამატებითი სტიმულია, რომ უფრო წარმატებული იყვნენ. ფინანსურადაც ძალიან საინტერესოა, ის მე-4 გუნდი, ვინც გავა, მინიმუმ მილიონი ლარს მონაწილეობისთვის მიიღებს და ერთი-ორი ეტაპი რომ გაიაროს, შეიძლება 2-3 მილიონი მიიღოს, რაც ქართული გუნდისთვის ფინანსურად ძალიან მნიშვნელოვანია. ასევე უეფა ყოველი წლის ბოლოს ფედერაციას ურიცხავს თანხას, რომელიც ყველა გუნდზე ნაწილდება და უმაღლესი ლიგის კლუბს 600 ათას ლარზე ოდნავ მეტი ყოველწლიურად ხვდება. ჩვენ როგორც ვიცით, შეიძლება ეს თანხა გაორმაგდეს [იბერიას კონფერენს ლიგაზე გასვლის გამო], ამიტომ მარტო იბერიამ არ ისარგებლა.
იბერიას წარმატება პირდაპირპროპორციულია იმისა, რომ სხვა გუნდებიც მიიღებენ ამ სარგებელს, ამიტომაც ერთმანეთის თანადგომა ძალიან მნიშვნელოვანია." - განაცხადა იბერიას პრეზიდენტმა იუთუბ-გადაცემა ,,ორშაბათობაში"
იბერია 1999 თავის მომდევნო მატჩს კონფერენს ლიგაზე 5 ნოემბერს, კოპენჰაგენთან გასვლაზე გამართავს, 26 ნოემბერს კი მიხეილ მესხის სტადიონზე ხეტაფეს დაუპირისპირდება.
„დავიწყებ მადლიერებით" - იბერია 1999-ის პრეზიდენტი გულშემატკივრებზე
