"ეს მხოლოდ დასაწყისია" - გიგაური უფროსებში პირველ კარიერულ მედალზე

თბილისი არენაზე მიმდინარე ჯუდოს დიდ სლემზე, საქართველოს ნაკრებს პირველი მედალი 19 წლის თორნიკე გიგაურმა მოუტანა. 

"ძალიან გახარებული ვარ, ეს ჩემთვის საერთაშორისო ასპარეზზე უფროსებში პირველი შეჯიბრება იყო და მედლის მოპოვება შევძელი. დიდი მადლობა ქართველ გულშემატკივარს, რომელთაგან წამოსული მუხტი ყოველთვის გვაძლიერებს.

ჩემს კარიერულ მიზნებს რაც შეეხება, წინ დიდი გზაა, ბევრი ტურნირია და ყოველთვის ჩემს მაქსიმუმს გავიღებ. ეს მხოლოდ დასაწყისია", - თქვა გიგაურმა რეპორტიორებთან დაჯილდოვების შემდეგ.

-66 კგ. წონით კატეგორიაში, გიგაურმა 3 ბრძოლა მოიგო, 1/2 ფინალში კი აზერბაიჯანელ თურან ბაირამოვთან იპონით დამარცხდა. ბრინჯაოს მედლისთვის 21 წლის კვიპროსელ პეტროს ხრისტოდულიდესს შეხვდა და იპონით დაამარცხა.

ჩვენი ნაკრები გათამაშებაზე 42 სპორტსმენით არის წარმოდგენილი. მწვრთნელები რამდენიმე ლიდერს ასვენებენ, რისი მიზეზიც 16-19 აპრილს ასევე თბილისში გასამართი ევროპის ჩემპიონატია.