ეს პირველად მოხდა - რატომ არის ლიპარტელიანის ოქრო განსაკუთრებული?

ეთერ ლიპარტელიანი შვეიცარიის ქალაქ ლოზანაში გამართული გრანდ სლემის ჩემპიონი გახდა.

-57 კგ. წონით კატეგორიაში, ქართველმა ევროპისა და მსოფლიო ჩემპიონმა ფინალამდე 4 შეხვედრა მოიგო, სატიტულო დაპირისპირებაში კი ფრანგ სარა ლეონი სისიკის აჯობა და გრანდ სლემის ოქროს მედალი კარიერაში მესამედ მოიპოვა.

გრანდ სლემების ეგიდით, ლიპარტელიანს ჯამში უკვე 13 მედალი აქვს - 3 ოქრო, 4 ვერცხლი, 6 ბრინჯაო.

"ოქროს მედლის მოგება აქ, ოლიმპიურ დედაქალაქში ჩემთვის უდიდესი მოტივაციაა.

სარა ძალიან რთული მეტოქეა და ჩვენ ყოველთვის განსაკუთრებული ურთიერთშეხვედრები გვაქვს ხოლმე, ამიტომ ბედნიერი ვარ, რომ ამ ფინალში გამარჯვება შევძელი", - აღნიშნა ლიპარტელიანმა.

ხაზგასასმელია, რომ ეთერს აქამდე გრანდ სლემის ორივე ოქრო თბილისში ჰქონდა მოგებული (2024 და 2025) და უცხო ქვეყანაში ამ რანგის ტურნირის ჩემპიონობა პირველად იზეიმა.

ეთერ ლიპარტელიანი გასულ წელს მსოფლიო ჩემპიონი გახდა, წელს კი ევროპის ჩემპიონატი მოიგო - ორივე შემთვევაში, პირველი ქართველი ქალი ძიუდოისტია, რომელმაც ამ შედეგს მიაღწია. ასევე, ოლიმპიური თამაშების ბრინჯაოსმედალოსანია.