ესპანური დომინაცია გრძელდება: 400 მატჩი ინგლისური კლუბების წინააღმდეგ
ჩემპიონთა ლიგის მერვედფინალის პირველი რაუნდი ესპანურ-ინგლისური დაპირისპირებების ნამდვილ ზეიმად იქცა. რეალ მადრიდისა და მანჩესტერ სიტის შეხვედრა საიუბილეო, მე-400 მატჩი გამოდგა ამ ქვეყნების გუნდებს შორის ევროთასების ისტორიაში. მადრიდული გუნდების, რეალისა და ატლეტიკოს გამარჯვებებმა კიდევ ერთხელ დაამტკიცა ესპანური კლუბების უპირატესობა პრემიერლიგის გუნდებთან.
თუ მხოლოდ სამ მთავარ ტურნირს (ჩემპიონთა თასი/ლიგა, თასების მფლობელთა თასი და უეფას თასი/ევროპა ლიგა) ავიღებთ, მხარეებს შორის ფრეა : ორივე ქვეყნის ანგარიშზე 133-133 გამარჯვებაა.
თუმცა, ინგლისელებისთვის ამჯერად კოშმარული კვირა გამოდგა: ესპანელებმა ორი მოგება და ერთი ფრე მიითვალეს. საერთო ჯამში, ესპანურ კლუბებს 152 გამარჯვება დაუგროვდათ, ინგლისელებს კი - 143.
ბრძოლა თითოეული გოლისთვის
საინტერესო ვითარებაა გატანილ გოლებშიც. ევროთასებზე სულ 1081 გოლი გავიდა და აქაც ესპანელები მინიმალური უპირატესობით ლიდერობენ: 541:540-ის წინააღმდეგ. რეალ მადრიდს ინგლისელების კარში გატანილი მეასე გოლამდე მხოლოდ ერთი ბურთი აშორებს. ამ ნიშნულს აქამდე მხოლოდ ბარსელონამ (166) და მანჩესტერ იუნაიტედმა (102) გადააბიჯეს. ატლეტიკომ კი ტოტენჰემთან გატანილი ხუთი გოლით ინგლისური კლუბების წინააღმდეგ გატანილი გოლები 50-მდე გაზარდა.
ვინ არის ინგლისელების ნამდვილი რისხვა?
მიუხედავად იმისა, რომ ბარსელონამ ამჯერად მოგება ვერ მოიპოვა, ის კვლავ რჩება ინგლისური გუნდების მთავარ რისხვად 44 გამარჯვებით. შედარებისთვის, რეალ მადრიდს ინგლისელებთან 27 მოგება აქვს. პრემიერლიგიდან კი ყველაზე წარმატებულები მანჩესტერ იუნაიტედი (25) და ლივერპული (24) არიან.
ესპანეთმა უპირატესობა ჩემპიონთა ლიგაზეც დაიბრუნა, სადაც უკვე ერთი გამარჯვებითა (83-82) და ექვსი გოლით (310-304) უსწრებს მეტოქეს.
