ESPN FC-ის წამყვანმა, დან თომასმა საჯაროდ მოიხადა ბოდიში მას შემდეგ, რაც ინტერნეტში დიდი კრიტიკა მოჰყვა მის რეპლიკას, თითქოს არსენალის მწვრთნელი მიკელ არტეტა „სახეში მუშტის ჩარტყმას იმსახურებდა“.
ინციდენტი სამშაბათ ღამით, ჩემპიონთა ლიგის ნახევარფინალური მატჩის შემდეგ მოხდა, სადაც არსენალმა ატლეტიკო მადრიდი ბუკაიო საკას გოლით დაამარცხა და ფინალის საგზური მოიპოვა. თამაშის დროს არტეტა ტრადიციულად ემოციური იყო: ტოვებდა ტექნიკურ ზონას, დასდევდა ბურთებს და ხელს უშლიდა მეტოქე გუნდის ფეხბურთელებს აუტის მოწოდებისას.
მატჩის შემდგომ ანალიზისას თომასმა კოლეგებს ჰკითხა: „რომელ ეტაპზე გიჩნდებათ სურვილი, როგორც მეტოქე გუნდის მწვრთნელს, რომ არტეტას სახეში მუშტი ჩაარტყათ?“. მიუხედავად იმისა, რომ პანელისტმა კრეიგ ბერლიმ არტეტა დაიცვა და აღნიშნა, რომ დიეგო სიმეონეც ზუსტად ასე იქცევა, თომასი თავის აზრზე დარჩა და აღნიშნა, რომ არტეტამ ამ კომპონენტში სიმეონესაც კი აჯობა.
ეთერში მყოფმა არსენალის ყოფილმა მოთამაშემ, სტიუარტ რობსონმა, მწვრთნელის ქცევას „აბსოლუტურად პათეტიკური“ უწოდა. მისი თქმით, არტეტა ამ ყველაფერს მხოლოდ საკუთარი თავის გამოსაჩენად აკეთებს.
თომასის კომენტარი ვირუსულად გავრცელდა და გულშემატკივრების მწვავე რეაქცია გამოიწვია, რის შემდეგაც წამყვანმა განმარტება გააკეთა:
უბრალოდ მინდა გამოვეხმაურო ჩემს გუშინდელ ნათქვამს. ეს იყო გაუაზრებელი რეპლიკა, რომელიც სიტყვასიტყვით იქნა გაგებული. რა თქმა უნდა, ეს ასე არ მიგულისხმია. დღეს ამაზე ვიფიქრე და მივხვდი, რომ შემეძლო აზრი ბევრად უკეთ ჩამომეყალიბებინა.
