ევროპა ლიგის ფინალის წინ, ქალაქ ბილბაოში უეფას აღმასრულებელი კომიტეტის შეხვედრა გაიმართა, სადაც 2028 წლის ევროპის ჩემპიონატის საკვალიფიკაციო სისტემასთან დაკავშირებით გადაწყვეტილება მიიღეს.
ევრო 2028 დიდი ბრიტანეთისა და ირლანდიის 9 ქალაქში გაიმართება, ტურნირში მონაწილეობას კი 24 გუნდი მიიღებს.
საკვალიფიკაციო ეტაპზე 12 ჯგუფი იქნება 4 ან 5 გუნდით. მასპინძლები ინგლისი, ირლანდია, შოტლანდია და უელსი ასევე მიიღებენ მონაწილეობას შესარჩევში, ოღონდ ყველა მათგანი სხვადასხვა ჯგუფში განაწილდება.
ჯგუფების 12 გამარჯვებული და 8 საუკეთესო მეორეადგილოსანი (20 გუნდი) ევრო 2028-ის ფინალურ ეტაპზე პირდაპირ გავა.
2 ადგილი საუკეთესო შედეგის მქონე 2 მასპინძელი გუნდისთვის შეინახება, რომელიც ჯგუფის გამარჯვებული ან საუკეთესო მეორეადგილოსანი არ იქნება (20 გუნდში).
დარჩენილი 2 საგზური კი პლეიოფში გათამაშდება, რომელშიც მონაწილეობას შესარჩევის დანარჩენი მეორეადგილოსნები და 2026-27 სეზონის ერთა ლიგის საუკეთესო გუნდები (შესარჩევით ვერგასულები) მიიღებენ.
პლეიოფისთვის 3 სცენარია გათვალისწინებულია, რაც იმაზეა დამოკიდებული თუ რამდენი მასპინძელი გავა ფინალურ ეტაპზე,
თუ ორივე შენახულ ადგილს მასპინძლები მიიღებენ, მაშინ 8 გუნდი 2 ბადეში განაწილდება და 1/2 ფინალური და ფინალური მატჩების მეშვეობით მათ შორის 2 საუკეთესო გამოვლინდება.
თუ მასპინძლებზე მხოლოდ 1 შენახული ადგილი განაწილდა, მაშინ 12 გუნდი 3 ბადეში განაწილდება და პლეიოფის პრინციპით 3 საუკეთესო გუნდი გაირკვევა.
თუ მასპინძლებზე შენახული ადგილები არ განაწილდა, მაშინ 8 გუნდი სახლი-გასვლა პრინციპით გაარკვევენ 4 საუკეთესო გუნდის ვინაობას.
