გერმანიამ სლოვაკეთი გაანადგურა და მსოფლიო ჩემპიონატის საგზური გაინაღდა

მსოფლიო ჩემპიონატის საკვალიფიკაციო ეტაპის ბოლო ტურში გერმანიამ გადამწყვეტ მატჩში სლოვაკეთი გაანადგურა.

ლაიფციგში რედ ბულ არენაზე გამართული შეხვედრა გერმანიის გამარჯვებით 6:0 დასრულდა და იულიან ნაგელსმანის გუნდმა მსოფლიო ჩემპიონატის საგზური ოფიციალურად გაინაღდა.

ბოლო ტურის წინ მოვლენები საინტერესოდ იყო განვითარებული - გერმანია და სლოვაკეთი ჯგუფის პირველი ადგილისთვის იბრძოდნენ. ბურთების უკეთესი სხვაობის გამო გერმანიას ფრეც აწყობდა, თუმცა საქმის გართულება არ მოისურვა და მეტოქე უშანსოდ გაანადგურა.

დუბლი მიითვალა ლეროი სანემ, თითო გოლი კი ნიკ ვოლტემადემ, სერჟ გნაბრიმ, ბაკუმ და უოედრაოგომ შეაგდეს. აღსანიშნავია ასევე ფლორიან ვირცის ორი საგოლე გადაცემაც. 

გერმანიამ 15 ქულა დააგროვა და პირველი ადგილი დამაჯერებლად დაიკავა, სლოვაკეთი კი მუნდიალზე გასვლას პლეი-ოფიდან შეეცდება.