ისტორიაში პირველად: ფიფამ მუნდიალის გასაშუქებლად მთავარ სოციალურ ქსელად TikTok-ი აირჩია

ფიფამ გამოაცხადა, რომ 2026 წლის მსოფლიო ჩემპიონატის ვიდეოკონტენტის განთავსებისთვის „სასურველ პლატფორმად“ TikTok შეირჩა.

ფიფას განცხადებით, TikTok – ერთ-ერთი ყველაზე გავლენიანი და დინამიკური მობილური ვიდეოპლატფორმა მსოფლიოში – ორგანიზაციის ისტორიაში პირველად გახდება პრიორიტეტული პლატფორმა. ეს პარტნიორობა თანამშრომლობისა და ინტეგრაციის დონეს გაზრდის და TikTok-ს საშუალებას მისცემს, 2026 წლის მსოფლიო ჩემპიონატი უფრო სრულად გააშუქოს, მათ შორის გაზარდოს ორიგინალური კონტენტის რაოდენობა და მთელი ტურნირის განმავლობაში გახდეს მთავარი სივრცე გულშემატკივრებისა და კონტენტ-კრეატორებისთვის.

აღნიშნული თანამშრომლობა მნიშვნელოვან შესაძლებლობებს უხსნის მსოფლიო ჩემპიონატის ოფიციალურ მედიაპარტნიორებს TikTok-ზე: მათ შორისაა მატჩების ცალკეული ეპიზოდების პირდაპირ ეთერში გადაცემა, შერჩეული ვიდეოების უფრო ფართო გამოქვეყნება და ფიფას მიერ სპეციალურად TikTok-ისთვის შექმნილ ექსკლუზიურ კონტენტზე წვდომა.

ტელემაუწყებლებს ასევე ექნებათ შესაძლებლობა, საკუთარი ტრანსლაციები TikTok-ის პრემიუმ სარეკლამო ინსტრუმენტების დახმარებით დაამონეტირიზონ. ამასთან, TikTok დანერგავს ანტიპირატულ პოლიტიკას, რომელიც ფიფას ინტელექტუალურ საკუთრებას დაიცავს.

როგორც განცხადებაში წერია, კონტენტ-კრეატორებს მიეცემათ წვდომა პრესკონფერენციებსა და ვარჯიშებზე, ასევე შესაძლებლობა, გამოიყენონ და ერთობლივად შექმნან ფიფას არქივში დაცული ვიდეომასალები.