ოჯახური პრობლემის გამო - კიურასაოს მუნდიალზე გამყვანმა ადვოკაატმა პოსტი დატოვა

დიკ ადვოკაატმა კიურასაოს ნაკრების მთავარი მწვრთნელის პოსტი დატოვა.

ეს მოხდა 3 თვის შემდეგ, რაც მან ქვეყანას ისტორიაში პირველად მსოფლიო ჩემპიონატის საგზური მოაპოვებინა.

ნაკრებმა განცხადებაში აღნიშნა, რომ 78 წლის სპეციალისტი თანამდებობას ტოვებს, რათა საკუთარ ქალიშვილზე იზრუნოს, რომელსაც ჯანმრთელობის პრობლემები აქვს.

ის მსოფლიო ჩემპიონატზე დებიუტამდე ოთხ თვეზე ნაკლები ხნით ადრე გადადგა. კიურასაო გახდა მსოფლიო ჩემპიონატის ისტორიაში ყველაზე პატარა ქვეყანა, რომელმაც ტურნირზე კვალიფიკაცია მოიპოვა.

ადვოკაატის ნაცვლად პსვ-ის ყოფილი მთავარი მწვრთნელი, 63 წლის ფრედ რუტენი დაინიშნა.

ადვოკაატმა კიურასაოს ნაკრები 2024 წლის იანვარში ჩაიბარა და 185,000 მოსახლეობის მქონე კარიბის ზღვის კუნძულს მსოფლიო ჩემპიონატზე გასვლა დაუმარცხებელი საკვალიფიკაციო კამპანიის შედეგად მოუტანა.

კიურასაომ ჯგუფში, სადაც ბერმუდა, ტრინიდადი და ტობაგო და იამაიკა თამაშობდნენ, არცერთი მატჩი არ წააგო. მათი კვალიფიკაცია, რომელიც ნოემბერში იამაიკასთან ფრით დადასტურდა, ნიშნავს, რომ მათ გადაასწრეს ისლანდიას (350,000 მოსახლეობით), როგორც მსოფლიო ჩემპიონატზე გასული ყველაზე პატარა ქვეყანა.

„ყოველთვის ვამბობდი, რომ ოჯახი ფეხბურთზე წინ დგას, ამიტომ ეს გადაწყვეტილება ბუნებრივია.

ამასთან, ძალიან მომენატრება კიურასაო, მისი ხალხი და ჩემი კოლეგები. მსოფლიო ჩემპიონატზე მსოფლიოს ყველაზე პატარა ქვეყნის გაყვანას ჩემს კარიერაში ერთ-ერთ უმნიშვნელოვანეს მიღწევად მივიჩნევ. ვამაყობ ჩემი მოთამაშეებით, შტაბითა და ხელმძღვანელობით, რომლებმაც ჩვენი დაიჯერეს!“ - - განაცხადა ადვოკაატმა.

ნიდერლანდელ სპეციალისტს მანამდე მსოფლიო ჩემპიონატებზე ნიდერლანდებისა და სამხრეთ კორეის ნაკრებები ჰყავს გაწვრთნილი, შესაბამისად 1994 და 2006 წლებში.

ქვეყნის ფეხბურთის ფედერაციის პრეზიდენტმა განაცხადა, რომ კიურასაო „სამუდამოდ მადლიერი დარჩება“ ადვოკაატის მიმართ და რომ „მისი გადაწყვეტილება მხოლოდ პატივისცემას იმსახურებს“.

კიურასაო ამ ზაფხულის ტურნირზე E ჯგუფში გერმანიას, კოტ-დ’ივუარსა და ეკვადორს დაუპირისპირდება. მათი პირველი მატჩი 14 ივნისს გაიმართება გერმანიის წინააღმდეგ.