„ოპტიმიზმი რთულია“, — ირანმა ჩემპიონატი შეაჩერა და შესაძლოა მუნდიალიდან ჩაიხსნას

ირანის ფეხბურთის ფედერაციის პრეზიდენტმა, მეჰდი ტაჯმა, აშშ-სა და ისრაელთან კონფლიქტის გამწვავების ფონზე, ეროვნული ნაკრების 2026 წლის მსოფლიო ჩემპიონატზე მონაწილეობის შესახებ კომენტარი გააკეთა.

ვითარება მას შემდეგ დაიძაბა, რაც 28 თებერვალს ისრაელის თავდაცვის ძალებმა ირანზე „პრევენციული“ დარტყმა განახორციელეს, რაშიც აშშ-ის მონაწილეობა პრეზიდენტმა დონალდ ტრამპმაც დაადასტურა. ამას ირანის მხრიდან ისრაელზე საპასუხო იერიში მოჰყვა.

ირანის ნაკრებს მუნდიალის ჯგუფური ეტაპის სამივე მატჩი სწორედ აშშ-ში აქვს ჩანიშნული: 15 ივნისს ახალ ზელანდიასთან (ლოს-ანჯელესი), 21 ივნისს ბელგიასთან (ლოს-ანჯელესი) და 26 ივნისს ეგვიპტესთან (სიეტლი). გარკვეული სცენარით, ირანი და აშშ შესაძლოა პლეი-ოფის პირველივე რაუნდში შეხვდნენ ერთმანეთს.

მეჰდი ტაჯის თქმით, გუნდის ტურნირზე გამგზავრება ახლა დიდი კითხვის ნიშნის ქვეშ დგას:

„დღევანდელი მოვლენებისა და აშშ-ის მხრიდან თავდასხმის შემდეგ, რთულია ოპტიმიზმით ვუყუროთ მსოფლიო ჩემპიონატს. თუმცა, საბოლოო გადაწყვეტილება სპორტის ხელმძღვანელებმა უნდა მიიღონ“.

ფედერაციის ხელმძღვანელმა ასევე დაადასტურა ირანის შიდა ჩემპიონატის დაუყოვნებლივ და განუსაზღვრელი ვადით შეჩერება. Marca-ს ცნობით, ირანული მხარე უსაფრთხოების გარანტიებისა და პოლიტიკური ვითარების გათვალისწინებით, შესაძლოა ტურნირიდან ჩაეხსნას.