გრინი თავისუფალი აგენტია - ლებრონისთვის უორიორსის კარი იხსნება

გოლდენ სტეიტ უორიორსის მომავლის გარშემო არსებული გაურკვევლობის ფონზე, გუნდის ერთ-ერთი მთავარი ფიგურა თავისუფალი აგენტი ხდება.

ESPN-ის ინფორმაციით, გოლდენ სტეიტის ფორვარდმა დრეიმონდ გრინმა უარი თქვა 27.7 მილიონი დოლარის ღირებულების მოთამაშის ოფციაზე და თავისუფალი აგენტის სტატუსი მიიღო.

ეს ნაბიჯი უორიორსს მეტ ფინანსურ მოქნილობას აძლევს, რათა თავისუფალი აგენტის ბაზარზე ლებრონ ჯეიმსის დამატება სცადოს და ასევე ენტონი დევისის გაცვლის გზით გადაბირება, რის შედეგადაც გუნდმა შესაძლოა „დიდი ოთხეული“ ჩამოაყალიბოს.

მიუხედავად იმისა, რომ გრინის მომავალი უორიორსში სრულად გარანტირებული აღარ არის, ოფციაზე უარის თქმა არ ნიშნავს, რომ მისი დრო გოლდენ სტეიტში დასრულდა.

NBA-ს ინსაიდერებმა მარკ სტეინმა და ჯეიკ ფიშერმა აპრილში გაავრცელეს ინფორმაცია, რომ უორიორსის სურვილია გრინმა უარი თქვას არსებულ ოფციაზე და გააფორმოს უფრო ხანგრძლივი კონტრაქტი დაბალი წლიური ანაზღაურებით.

თუ ეს მოხდება, გოლდენ სტეიტი სამომავლო გეგმების განხორციელებისთვის დამატებით ფინანსურ მოქნილობას მიიღებს.

36 წლის გრინმა გასულ სეზონში საშუალოდ მატჩში 8.4 ქულა, 5.5 მოხსნა და 5.5 შედეგიანი გადაცემა დააგროვა.

მიუხედავად იმისა, რომ ის აღარ არის ის „წლის საუკეთესო მცველი“ და ყველა ვარსკვლავის მატჩის დონის მოთამაშე, როგორიც კარიერის პიკში იყო, გრინი კვლავ ძალიან სასარგებლო კალათბურთელია და გუნდისთვის მნიშვნელოვანი აქტივი რჩება.

ახლა მთავარი კითხვა ისაა, დარჩება თუ არა გრინი გოლდენ სტეიტში, თუ კარიერაში პირველად სხვა გუნდთან გააფორმებს კონტრაქტს.

მაისში მან განაცხადა, რომ საკუთარი თავი სხვა ფრენჩაიზში ვერ წარმოუდგენია, თუმცა შესაძლოა საკმარისად მიმზიდველმა შეთავაზებამ მისი გადაწყვეტილება შეცვალოს.