NBA-ის ისტორიაში გამარჯვებების რაოდენობით მეორე ყველაზე წარმატებული მწვრთნელი დონ ნელსონი, რომელმაც მოთამაშის რანგში ბოსტონ სელტიკსთან ერთად 5-ჯერ მოიგო ჩემპიონობა, 86 წლის ასაკში გარდაიცვალა.
„ჩვენი საყვარელი მეუღლე, მამა, ბაბუა და დიდი ბაბუა დონ ნელსონი მშვიდად მიებარა უფალს, საყვარელი ოჯახის წევრების გარემოცვაში,“ - ნათქვამია მისი ოჯახის განცხადებაში.
სიცოცხლის ბოლო კვირის განმავლობაში მის გვერდით მეგობრები და ოჯახის წევრები იყვნენ, რომლებიც სიყვარულით ეხვეოდნენ, მის მეგობრობას მადლიერებით იხსენებდნენ და ძვირფას მოგონებებს უზიარებდნენ ერთმანეთს.
ნელსონი NBA-ის ისტორიაში იმ 2 მწვრთნელიდან ერთ-ერთია, რომლებმაც 3 სხვადასხვა გუნდში მინიმუმ 250 გამარჯვება მოიპოვეს.
ეს გუნდებია მილუოკი ბაქსი, დალას მავერიქსი და გოლდენ სტეიტ უორიორსი. ამასთან, სამივე კლუბში მას გენერალური მენეჯერის თანამდებობაც ეკავა.
ნელსონი 3-ჯერ დასახელდა NBA-ის წლის საუკეთესო მწვრთნელად და 31-სეზონიანი სამწვრთნელო კარიერის განმავლობაში პლეი-ოფში 18-ჯერ გავიდა.
ბაქსთან ერთად კონფერენციის ფინალში 3-ჯერ ითამაშა, მავერიქსთან კი - ერთხელ, თუმცა მწვრთნელის რანგში NBA-ის ჩემპიონობა არასდროს მოუგია.
ის მნიშვნელოვანი მენტორი იყო არაერთი კალათბურთელისთვის, რომლებსაც კარიერის საწყის ეტაპზე წვრთნიდა. მათ შორის იყვნენ დირკ ნოვიცკი და სტეფ კარი.
„ერთ-ერთი მთავარი მიზეზი, რის გამოც უორიორსმა დრაფტზე ამირჩია, დონ ნელსონი იყო. ამბობდნენ, რომ მას ახალბედები დიდად არ უყვარდა, მაგრამ პირველივე დღიდან მომცა შესაძლებლობა, მოედანზე საკუთარი თავის საუკეთესო ვერსია მეჩვენებინა,“ - განაცხადა კარიმ.
მან ამ სპორტზე განუზომელი გავლენა მოახდინა და ისტორიაში თამაშის ერთ-ერთ უდიდეს მოაზროვნედ დარჩება. ის ნამდვილი ლეგენდაა და ის უამრავ ადამიანს დააკლდება, რომელთა ცხოვრებასაც თავისი ლეგენდარული კარიერის განმავლობაში შეეხო, მათ შორის მეც.
სიყვარულს ვუგზავნი ჯოის, მის ოჯახს და ყველას, ვისაც მისი გაცნობის ბედნიერება ჰქონდა.“
