საქართველოს ეროვნული ნაკრების მთავარმა მწვრთნელმა, ვილი სანიოლმა თურქეთთან მარცხის შემდეგ ჟურნალისტებთან კომენტარი გააკეთა.
"მატჩი დაბალ ტემპში, ისე დავიწყეთ, თითქოს მოგება ადვილად შეგვეძლო. თუმცა, კარგად ვიცით, რომ თუკი ასეთი ძლიერი მეტოქის წინააღმდეგ ყველაფერს არ გაიღებ, შანსი არ გექნება. მათი მოთამაშეები მაღალი დონის ლიგებში თამაშობენ და კარგად ესმით, ასეთი მნიშვნელობის შეხვედრაში როგორი შეგნებით უნდა ითამაშო. ჩვენ ასე არ დაგვიწყია. ეს დიდი განსხვავება იყო.
გასულ წელს ჩვენი მებრძოლი სული, ერთიანობა და ის ფაქტი განგვასხვავებდა, რომ ბოლო სასტვენამდე ისე ვიბრძოდით, თითქოს ეს ჩვენი ცხოვრების უკანასკნელი თამაში ყოფილიყო. ვფიქრობ, ბოლო დროს ეს თვისება ნელ-ნელა დავკარგეთ. ეს გვაბრუნებს იმ პერიოდში, როცა ვიცოდით, რომ მოსაგებად ნებისმიერ შეხვედრაში ბევრი, ძალიან ბევრი უნდა გვებრძოლა. ბოლო დროს ეს დავივიწყეთ და უახლოეს კვირებსა თუ თვეებში ჩვენი ამოცანაა, რომ ისევ ისეთი მოტივირებული საქართველოს ნაკრები დავაბრუნოთ.
გუნდში არიან როგორც ძლიერი, ასევე სუსტი მოთამაშეები. უახლოეს პერიოდში ამ საკითხს უნდა მივხედოთ. ჩვენ იმაზე მეტის გაკეთება მოგვიწევს, ვიდრე შეგვიძლია.
ჩვენ გვაქვს კომპონენტები, რომლებზეც მომავალში უნდა ვიმუშაოთ. თურქეთი ძლიერი გუნდია. მატჩის ბოლო ნაწილში ჩვენ მიერ ნაჩვენები თამაშით ვამაყობთ და მომავალში ამის მიხედვით ვიმუშავებთ.
მე მჯერა ჩემი მოთამაშეების. მჯერა, რომ საქართველოს კვლავ შეუძლია წარმატების მიღწევა. თუმცა, ნათლად უნდა ვთქვა: თუ არ შევეგუებით იმ აზრს, რომ ყველა მატჩში 100%-ით უნდა დავიხარჯოთ, შანსი არ გვექნება. ეს იქნება ჩვენი ყველაზე დიდი აქცენტი მომდევნო პერიოდში - გუნდური ძალების აღდგენა, ინდივიდუალურ ნიჭზე დაყრდნობის ნაცვლად. დიახ, ჩვენ გვყავს კარგი ინდივიდუალური მოთამაშეები, მაგრამ სხვა გუნდებსაც ჰყავთ. განსხვავება ის უნდა იყოს, რომ ძლიერ გუნდად ვიქცეთ", - განაცხადა სანიოლმა.
შესარჩევი ეტაპის 4 ტურის შემდეგ, საქართველოს 3 ქულა აქვს და მე-2 ადგილოსან თურქეთს 6 ქულით ჩამორჩება - ლიდერ ესპანეთს 12 ქულა აქვს.
ნოემბრის სანაკრებო პაუზისას, ჩვენი გუნდი ჯერ ესპანეთს უმასპინძლებს (15 რიცხვში), შემდეგ კი ბულგარეთს ესტუმრება (18-ში).
