იტალიის ნაკრებიდან წამოსვლის შემდეგ, პაოლო მალდინიმ Corriere dello Sport-თან თავის პირველ ვრცელ ინტერვიუში რამდენიმე მნიშვნელოვანი დეტალი გაამხილა.
გვარდიოლა იტალიის ნაკრებთან იმაზე ახლოს იყო, ვიდრე ვინმეს ეგონა
ბარსელონაში პეპთან მთელი დღე გავატარეთ. ის თანხმობასთან ძალიან ახლოს იყო. ფურცელზე უკვე შემადგენლობებსაც კი წერდა.
სიმართლე არ არის, თითქოს მან 20 მილიონი ევრო მოითხოვა. ფული საერთოდ არ ყოფილა განხილვის თემა. პეპმა გვითხრა: წინა მწვრთნელზე ერთი ევროთი ნაკლები მომეცით და ჩემთვის მისაღები იქნება.
საბოლოოდ მან უარი იმიტომ თქვა, რომ დაღლილი იყო. პრემიერ ლიგაში 10 უმძიმესი წელი გაატარა. ცოტა ხნის წინ ზურგზე ოპერაციაც გაიკეთა. დასვენება სურდა.“
რატომ იყო არჩევანი პირლოზე
„ჩვენი იდეა ტექნიკურ მხარეზე, შემტევ ფეხბურთსა და ცვლილებებზე იყო ორიენტირებული.
გვინდოდა ახალგაზრდა მწვრთნელი, რომელსაც იტალიის ნაკრებთან საკუთარი ისტორია ჰქონდა.
პირლოსთან ერთად დანიელე დე როსისა და ფაბიო გროსოზეც ვფიქრობდით, სამივე მსოფლიო ჩემპიონია. მაგრამ მალაგომ გვითხრა, რომ სერია A-ს მხრიდან ერთ-ერთი პირობა იყო, მათ მწვრთნელებს არ შევხებოდით.
ის, რომ პირლო გამარჯვებული მწვრთნელი არ არის, მხოლოდ პირადი მოსაზრებაა. ყოველთვის, როცა პირლოს ვესაუბრები, ძალიან მომზადებულ ადამიანად მეჩვენება.
თუ მას ტექნიკური დირექტორი დაუდგებოდა გვერდით, იდეალური მწვრთნელი იქნებოდა. როგორი რეზიუმე ჰქონდათ ბოლო ორ მწვრთნელს, რომლებმაც ნაკრებებთან ერთად დიდი საერთაშორისო ტურნირი მოიგეს? სკალონისა და დე ლა ფუენტეს.
თუ მხოლოდ მწვრთნელზე ფიქრობ, მხოლოდ დღევანდელ დღეზე ფიქრობ და არა ხვალინდელზე.“
პირლოს კონტრაქტი რუსულ კომპანიასთან
პირლო მზად იყო რუსულ კომპანიასთან კონტრაქტის გაწყვეტის საკითხი მოეგვარებინა. ის კარგი ადამიანია და ყველაფერს, რაც მოხდა, არ იმსახურებდა.
იტალიის ნაკრების მწვრთნელად მისი დანიშვნის რეალური სურვილი რომ ყოფილიყო, გამოსავალს აუცილებლად იპოვიდნენ.“
მანჩინისა და კონტეს შესახებ
საქმე ის არ არის, რომ მანჩინი არ მომწონს. მანჩინიც და კონტეც შესანიშნავი მწვრთნელები არიან.
ეს მეგობრობის საკითხი არ ყოფილა. უბრალოდ, ჩვენ განსხვავებული პროექტი გვქონდა.“
პროექტი მხოლოდ მწვრთნელის დანიშვნაზე გაცილებით დიდი იყო
„იტალიური ფეხბურთის რეფორმირებას დრო სჭირდება. ტალანტების აღზრდა ხანგრძლივი პროცესია.
გვინდოდა შეგვექმნა ახალი მოძრაობა, რომელშიც ფედერაციის ყველა რგოლი იქნებოდა ჩართული: სერია A, სერია B, სერია C, სამოყვარულო ფეხბურთი, მწვრთნელები, მსაჯები და ფეხბურთელები.
უნდა მოვმზადებულიყავით როგორც დღევანდელი, ისე ხვალინდელი დღისთვის.
8-10 წელი ბევრია? ეს ერთადერთი საკითხი იყო, რომელზეც სერია A-ს ეჭვები ჰქონდა. თუმცა ეს ვადა სხვა ქვეყნების გამოცდილებაზე დაყრდნობით განვსაზღვრეთ, არა მხოლოდ ისეთი დიდი საფეხბურთო ქვეყნების, როგორებიც ინგლისი, საფრანგეთი და ესპანეთი არიან, არამედ შედარებით პატარა ქვეყნებისაც, მაგალითად, შვეიცარიის.“
გარდამტეხი მომენტი
„პირველი, რაც მალაგოს ვკითხე, იყო, თუ ვინ აირჩევდა იტალიის ნაკრების მთავარ მწვრთნელს?
მან გვითხრა, რომ მწვრთნელს ჩვენ ავირჩევდით და ის ჩვენს არჩევანს მხარს დაუჭერდა.
შემდეგ კი განვითარდა მოვლენები, რომლებმაც ეს ყველაფერი შეცვალა.“
