ბარსელონას მთავარ მწვრთნელ ჰანსი ფლიკსა და სპორტულ დირექტორ დეკუს გიორგი მიქაუტაძის მიმდინარე ზაფხულში შესაძლო ტრანსფერთან დაკავშირებით განსხვავებული მოსაზრებები აქვთ.
ამის შესახებ ბლაუგრანას ინსაიდერი ჟერარ რომერო იუწყება, რომელმაც სიტუაციასთან დაკავშირებით ახალი ინფორმაცია გაავრცელა.
მიქაუტაძე ერთ-ერთია იმ მრავალ შემტევ ფეხბურთელს შორის, რომლებსაც ბოლო თვეების განმავლობაში კამპ ნოუზე შესაძლო გადასვლას უკავშირებდნენ.
მადრიდის ატლეტიკოს თავდამსხმელის, ხულიან ალვარესის, ტრანსფერის განხორციელებასთან დაკავშირებული სირთულეების ფონზე, გავრცელებული ინფორმაციით, ბარსელონას ხელმძღვანელობამ საქართველოს ნაკრების ფეხბურთელი ალტერნატიულ სამიზნედ შეარჩია მომავალი სეზონისთვის.
თავის მხრივ, მიქაუტაძემ ლა ლიგაში სადებიუტო სეზონი საკმაოდ პროდუქტიულად ჩაატარა, 32 შეხვედრაში მან 19 გოლში მიიღო უშუალო მონაწილეობა.
თუმცა, როგორც ზემოთ აღვნიშნეთ, მაშინ როცა კატალონიური გრანდის ერთ-ერთი მთავარი ფიგურა სრულად არის დარწმუნებული, რომ 25 წლის ფეხბურთელი ბარსელონაში გადასასვლელად მზადაა, მეორე ამ საკითხს ჯერ კიდევ გარკვეული ეჭვით უყურებს.
საკუთარ Twitch-არხზე საუბრისას ბარსელონას სატრანსფერო საკითხების ექსპერტმა და Jijantes-ის ჟურნალისტმა ჟერარ რომერომ განაცხადა:
„ამ მომენტისთვის, 13 აგვისტოს მდგომარეობით, ჰანსი ფლიკი ჯერ კიდევ არ არის ბოლომდე დარწმუნებული ვილიარეალის ფეხბურთელ მიქაუტაძეში.
დეკუს კი, პირიქით, ყველაფერი ძალიან ნათლად აქვს გადაწყვეტილი, ჰანსის ჯერ არა. ვნახოთ, როგორ დასრულდება ეს ისტორია.
ამასთან, არსებობს ფინანსური საკითხიც, რადგან ვილიარეალი ფეხბურთელში ძალიან დიდ თანხას ითხოვს.“
