ბარსელონას სპორტულმა დირექტორმა განმარტა, რატომ გადაწყვიტეს გასულ ზაფხულს ჩავის ჰანსი ფლიკით ჩანაცვლება.
„ჩავი თავის დროზე კლუბისთვის ძალიან მნიშვნელოვანი იყო, მან სტაბილურობა და ლა ლიგის ტიტული მოგვიტანა. რაც შეეხება მის შეცვლას ფლიკზე... იმ მომენტში რაღაც მიზეზების გამო ჩავთვალეთ, რომ სხვა მიდგომის მქონე მწვრთნელი გვჭირდება. ვფიქრობ, ამ თვალსაზრისით ჰანსიმ იდეალურად გაამართლა და ყველაფერი კარგად აეწყო.
ის თანამედროვე მწვრთნელია, რომელიც წლები მუშაობდა გერმანიის ნაკრებში - ჯერ დამხმარედ, შემდეგ მთავარ მწვრთნელად. ასევე, დიდ წარმატებას მიაღწია ბაიერნშიც.
მისი ბაიერნი საოცარი იყო, მომაჯადოვებელი, იმიტომ რომ შემტევ ფეხბურთს თამაშობდა კონკრეტული სტრატეგიით. რაღაც მხრივ, ეს ბარსელონას იდეოლოგიასაც ჰგავს.
ჩვენი იდეაა - გვყავდეს გუნდი, რომელიც თამაშის წაყვანას ცდილობს. შეიძლება ვიკამათოთ ხარისხზე, მაგრამ ჩვენი ფეხბურთი არასდროს იქნება დაცვითი. ჰანსიმ მაქსიმალურად გახსნა ჩვენი ფეხბურთელების პოტენციალი და მგონია, რომ სწორედ ეს გახდა იმ წარმატების საწინდარი, რომელსაც გასულ სეზონში მივაღწიეთ." - აღნიშნა პორტუგალიელმა ფუნქციონერმა.
