ჰელმუტ მარკო რედ ბულს ტოვებს - იმოქმედებს ეს მაქსზე?

Sky Sports-ის ცნობით, რედ ბულის მრჩეველი ჰელმუტ მარკო წლის ბოლოს კომპანიას დატოვებს.

მარკო ფორმულა 1-ში რედ ბულს 2005 წლიდან აძლევს რჩევებს, ასევე ავსტრიული კომპანიის მეორე გუნდ რეისინგ ბულსს, რომელმაც F1-ში პირველ ნაბიჯები 2006 წელს, ტორო როსოს სახელით გადადგა.

82 წლის მარკოს ახლო ურთიერთობა აქვს მაქს ვერსტაპენთან და ცნობილია, რომ მან მნიშვნელოვანი როლი ითამაშა 2024 წელს, როდესაც კრისტიან ჰორნერის მიმართ ბრალდებების ფონზე მაქსის მომავალი გაურკვეველი იყო.

მარკო გადამწყვეტი ფიგურა იყო რედ ბულის ახალგაზრდა პილოტების პროგრამაში და მათთვის F1-ში შესაძლებლობის მიცემაში, სადაც რედ ბული მკაცრი გადაწყვეტილებებით გამოირჩეოდა.

რედ ბულის აღმასრულებელი დირექტორი ოლივერ მინტცლაფი გუნდში ყველაფრის ახლიდან დაწყებას ცდილობს, მარკოს წასვლა, რომელიც ზაფხულში ჰორნერის გაშვებას მოჰყვა, ამ ახალი დასაწყისის ნაწილია.

იმოქმედებს თუ არა მარკოს წასვლა მაქსზე?

მაქსმა მარკო ადრე „მნიშვნელოვან ფიგურად“ და „მეორე მამად“ მოიხსენია, ასეთ პატივს სცემს ის ავსტრიელს, რომელსაც 2013 წელს შეხვდა, მაშინ როცა 15 წლის იყო.

მარკო რედ ბულს მაქსის გაფორმებაში დაეხმარა, ის ფორმულა 1-ში მაშინვე აიყვანეს, როცა პილოტს მხოლოდ ერთი წელი ჰქონდა გავლილი ფორმულა 3-ში, რის შედეგადაც 17 წლის ასაკში ის F1-ის ისტორიაში ყველაზე ახალგაზრდა მრბოლელი გახდა (2015).

მაქსი მარკოს ერთგულია, რადგან მან დაარწმუნა რედ ბული, რისკზე წასულიყვნენ და ასეთი ახალგაზრდა მრბოლელი გაეფორმებინათ.

ნიდერლანდელს რედ ბულთან კონტრაქტი 2028 წლის ბოლომდე აკავშირებს, თუმცა გუნდში არსებული დაძაბულობის გამო მისი სამომავლო გეგმები ბოლო ორი წლის განმავლობაში კითხვის ნიშნის ქვეშ დადგა.

მაქსის დარჩენისთვის მთავარი ფაქტორი კვლავ ბოლიდის სიჩქარე იქნება, განსაკუთრებით 2026 წლის ახალი რეგულაციების გათვალისწინებით, რომელიც ძალთა განაწილებას მნიშვნელოვნად შეცვლის.

სეზონის მეორე ნახევარში რედ ბულის პროგრესმა მაქსი დაარწმუნა. გუნდმა თითქმის შეძლო საოცარი დაბრუნება და მრბოლელთა ჩემპიონატის წართმევა მაკლარენისა და ლანდო ნორისისთვის.

მიუხედავად იმისა, რომ რედ ბულში გარემო ბოლო წლებთან შედარებით უკეთესია, ნიდერლანდელისთვის მთავარი მაინც ბოლიდის სისწრაფე იქნება, ამიტომ ნაკლებად სავარაუდოა, რომ მარკოს წასვლა მის მომავალზე გავლენას მოახდენს.