მიმდინარე სეზონში იბერიას მოთამაშეთა სატრანსფერო ღირებულებების ზრდამ სრულიად ახალ მასშტაბებს მიაღწია.
ეროვნულ ლიგაში საჩემპიონო რბოლის პარალელურად, თბილისური კლუბის ფეხბურთელების მიმართ ევროპული სკაუტების ყურადღება საგრძნობლად გაიზარდა, რასაც საერთაშორისო სატრანსფერო პლატფორმებზე ასახული ციფრებიც ადასტურებს.
სეზონის სტარტიდან დღემდე რამდენიმე ახალგაზრდა მოთამაშის საბაზრო ფასმა დიდი ზრდა აჩვენა, რაც კლუბის სწორად დაგეგმილი სპორტული მენეჯმენტისა და განვითარების სტრატეგიის პირდაპირი შედეგია.
ყველაზე შთამბეჭდავი პროგრესი 17 წლის შემტევ ნახევარმცველ ანდრია ბართიშვილს უკავშირდება, რომლის სატრანსფერო ღირებულებაც სარეკორდო 2.5 მილიონ ევრომდე გაიზარდა. ბართიშვილის საოცარი ტექნიკური შესაძლებლობები, მოედანზე გადაწყვეტილებების მიღების სისწრაფე და შეტევების ორგანიზების უნარი მას ევროპული გრანდების ყურადღების ცენტრში აყენებს.
მის გვერდით პროგრესირებს 19 წლის ცენტრალური მცველი ალექსანდრე ამისულაშვილი, რომლის საბაზრო ფასმაც 700 ათას ევროს მიაღწია. ამისულაშვილის დაცვითი სტაბილურობა და ჰაერში თამაში თანამედროვე ევროპული ცენტრალური მცველის ყველა კრიტერიუმს აკმაყოფილებს. ასევე 700 ათას ევრომდეა გაზრდილი 21 წლის საყრდენი ნახევარმცველის, ნიკოლოზ დადიანის ღირებულებაც, რომელიც მოედნის ცენტრში ბურთის კონტროლისა და შავ სამუშაოზე პასუხისმგებლობის აღების კუთხით გუნდის შეუცვლელი ფიგურა გახდა.
შეტევის ფლანგებზე განსაკუთრებულ ყურადღებას იპყრობს 22 წლის ვახო ბედოშვილი, რომლის სატრანსფერო ფასი 500 ათას ევროს შეადგენს. ბედოშვილის დრიბლინგი და ინდივიდუალური ოსტატობა იბერია 1999-ის შეტევითი პოტენციალის ერთ-ერთი მთავარი მამოძრავებელი ძალაა. ამასთანავე, სტაბილურობას ინარჩუნებენ ისეთი გამოცდილი და პერსპექტიული მოთამაშეები, როგორებიც არიან ჯემალ-გიორგი ჯინჯოლავა, გიორგი კუცია და სებასტიან ფიგერედო, რომელთა ღირებულებაც 400 ათასი ევროს ფარგლებში მერყეობს. ეს ბალანსი ახალგაზრდა ნიჭიერ ფეხბურთელებს საშუალებას აძლევს, უფრო გამოცდილი პარტნიორების გვერდით სწრაფად გაიზარდონ და პროფესიული თვისებები დახვეწონ.
