"იმედია, კვარა მალე დაბრუნდება" - უნგრელთა მწვრთნელის მატჩისწინა პრესკონფერენცია

უნგრეთის ნაკრების მთავარმა მწვრთნელმა, მარკო როსიმ საქართველოსთან მატჩამდე პრესკონფერენციაზე შეფასებები გააკეთა.

"კვარაცხელიას ჩანაცვლება შეუძლებელია. როცა მისი დონის ფეხბურთელს უპირისპირდები, განსაკუთრებული ტაქტიკაა საჭირო. წინა თამაშში ჩვენი ძირითადი დავალება შევასრულეთ და სასურველ შედეგსაც მივაღწიეთ. ხვალ ყველანაირი სცენარისთვის მზად ვიქნებით.

ვფიქრობ, საქართველოს ნაკრები განსხვავებულ ტაქტიკას აირჩევს და მისი სქემა მოქნილი იქნება. მათგან კარგ თამაშს ველით, არაერთი ძლიერი ფეხბურთელი ჰყავთ. სასურველი შედეგის მისაღწევად პროფესიონალური მიდგომა იქნება საჭირო.

ამ შეკრებაზე ორი ვარჯიში ჩავატარეთ. ახალი არაფერია იმაში, რომ გასვლითი მატჩისთვის ბოლო ვარჯიშს უნგრეთში ვატარებთ და შესაბამის ქვეყანაში ამის შემდეგ მივემგზავრებით, ეს წლებია ასეა.

მე, როგორც ნაპოლის გულშემატკივარი, ვიმედოვნებ კვარა მალე გამოჯანმრთელდება და მოედანს დაუბრუნდება.

წინა შეკრებასთან შედარებით, 3 ფეხბურთელი დაგვიბრუნდა, ახლა ორი კარგი მარჯვენა მცველი გვყავს და ჯერ არ ვიცი, ძირითადში ვინ ითამაშებს. ორივე კარგ ფორმაშია და დარწმუნებული ვარ, ამ მხრივ პრობლემა არ გვექნება", - განაცხადა როსიმ, რომელიც უნგრელთა მთავარ გუნდს 2018 წლიდან წვრთნის და მსოფლიოში ერთ-ერთი ყველაზე ხანგრძლივმოქმედი სანაკრებო მწვრთნელია.

4 ტურის შედეგებით, ჯგუფს 8-ქულიანი ჩრდილოეთ ირლანდია ლიდერობს, უნგრეთს 7 ქულა აქვს, უკრაინას - 4, ხოლო საქართველოს - 2.

საქართველო უნგრეთთან ისტორიაში მეოთხე ურთიერთშეხვედრას ჩაატარებს: 2-ჯერ უნგრელებმა მოიგეს, ერთხელ - ჯვაროსნებმა (2002 წლის მსოფლიო ჩემპიონატის საკვალიფიკაციოზე, თბილისში).

საქართველოსა და უნგრეთის ნაკრებთა შეხვედრა 14 ნოემბერს, მიხეილ მესხის სახელობის სტადიონზე 20:00 საათიდან გაიმართება.

მატჩზე დასასწრები ბილეთების შეძენა ამ ბმულზეა შესაძლებელი. 13 ნოემბრის 17:00 საათის მონაცემებით, 16 500-მდე ბილეთია გაყიდული. პირდაპირი რეპორტაჟი პირველ არხზეა.

რა შანსები აქვს საქართველოს ერთა ლიგაზე?