"იმედია, მეც მექნება ასეთი პრობლემები" - ალეგრი კონტეს აზრს დაუპირისპირდა

ანტონიო კონტეს გადატვირთულ კალენდარზე ჩივილის შემდეგ, მასიმილიანო ალეგრის კოლეგისგან სრულიად განსხვავებული ხედვა აქვს.

„თუ გინდა მაღალი დონის შენარჩუნება, ბევრი მატჩის თამაში გჭირდება. იმედი მაქვს, საკლუბო მსოფლიო ჩემპიონატზეც ვითამაშებთ. მესმის, ხალხი ამბობს, რომ კალენდარში ძალიან ბევრი თამაშია…

შეიძლება რაღაც ვთქვა? იუვენტუსში 5 წელი გავატარე: მოვიგეთ 5 სკუდეტო, 4 იტალიის თასი და ჩემპიონთა ლიგის 2 ფინალშიც გავედით, სხვებთან შედარებით ყველაზე მეტ მატჩს ვთამაშობდით.

იმედი მაქვს, მომავალ წელს მეც მექნება ასეთი ‘პრობლემები’, თუ შეიძლება ამას საერთოდ პრობლემები ვუწოდოთ.“ - განაცხადა მილანის თავკაცმა.

ნაპოლის მთავარმა მწვრთნელმა ალეგრის უპასუხა.

ჟურნალისტი: „რას ფიქრობთ ალეგრის სიტყვებზე, სადაც მან თქვა, რომ მაღალი დონის შესანარჩუნებლად ბევრი მატჩის თამაშია საჭირო?“

კონტე: „არ ვიცი, რა თქვა ალეგრიმ, მაგრამ აშკარაა, რომ წელს ბევრს არ თამაშობს.“