"ყველა სულელის აზრის გასაცნობად დროს ვერ დავხარჯავ" - კონტემ კოშტას უპასუხა

გასულ კვირას დიეგო კოშტამ ანტონიო კონტეს პიროვნული თვისებების შესახებ ისაუბრა და იტალიელი მწვრთნელი გააკრიტიკა.

კოშტას თქმით, კონტე მუდამ მოღუშული, გაბრაზებული და დამრიგებლურია, რადგან ჰგონია, რომ ყველაფერი თავად იცის.

იტალიელმა მწვრთნელმა ყოფილ შეგირდს უპასუხა და განაცხადა, რომ ყველა სულელი ადამიანის ნააზრევთა წასაკითხად დრო არ აქვს.

"სიმართლე გითხრათ, გაზეთებში დაბეჭდილი ამბების კითხვაში დროსა და ენერგიას არ ვკარგავ. ფეხბურთში არიან ინტელიგენტი და სულელი ადამიანები, შესაბამისად, ყველას აზრის მოსმენაზე დროს ვერ დავხარჯავ.

კოშტამ ჩემი ხელმძღვანელობით 1 სეზონი ითამაშა. შემიძლია საფეხბურთო კუთხით გელაპარაკოთ - ჩვენ მაშინ ჩემპიონატი მოვიგეთ. შემდეგ კი იგი გუნდიდან წასვლას სეზონის განმავლობაში 3-ჯერ შეეცადა. ამის შემდეგ არ ვიცი რა მოხდა", - თქვა კონტემ.

ანტონიო კონტე ჩელსის 2016-18 წლებში წვრთნიდა - პირველ სეზონში პრემიერ ლიგა მოაგებინა, შემდეგ წელს კი - ასოციაციის თასი. პრემიერ ლიგის საჩემპიონო სეზონში კოშტამ 27 საგოლე მოქმედება შეასრულა - 20 გოლი და 7 ასისტი.