ინგლისს საფრთხე ელის: იამალი უმნიშვნელოვანესი მატჩისთვის ბრუნდება

ინგლისის ნაკრებს ერთა ლიგის დასკვნით ტურში ურთულესი გამოცდა ელის.

მადრიდში გასამართი სუპერჯახის წინ, ესპანეთის ნაკრების მთავარმა მწვრთნელმა დაადასტურა, რომ გუნდს მთავარი შემტევი ძალა, ლამინ იამალი უბრუნდება.

ლუის დე ლა ფუენტეს გუნდმა პრაღაში ჩეხეთი 2:0 დაამარცხა (ალექს ბაენასა და მარკ პუბილის გოლებით) და ფენომენალური წაუგებელი სერია უკვე 43 მატჩამდე გაზარდა. ესპანელებმა ბოლოს 2024 წლის მარტში, კოლუმბიასთან წააგეს. მუხლის მცირე ტკივილის გამო იამალმა სწორედ ჩეხეთთან შეხვედრა გამოტოვა, თუმცა ის უკვე სრულ მზადყოფნაშია და მიკელ ოიარსაბალთან ერთად ეროვნულ ბანაკს შეუერთდა. ცნობისთვის, ამ პაუზამდე იამალს მიმდინარე სეზონში ზედიზედ 20 მატჩი ჰქონდა სასტარტოში დაწყებული და 17 გოლთან ერთად 13 ასისტიც დააგროვა.

რაც შეეხება მომავალ დაპირისპირებას, ინგლისმა თავის მხრივ ხორვატიას 2:1 მოუგო. ორივე საფეხბურთო გრანდს ერთა ლიგის მეოთხედფინალის საგზური უკვე განაღდებული აქვს, თუმცა მეტროპოლიტანოზე გასამართი კვირის მატჩი ჯგუფის გამარჯვებულის ვინაობას საბოლოოდ გაარკვევს.

ამჟამად ესპანეთი 3 ქულით წინ არის. ინგლისელებს პირველი ადგილის დასაკავებლად და მეტოქისთვის ფსიქოლოგიური დარტყმის მისაყენებლად უშეცდომო თამაში და ესპანელთა 43-მატჩიანი წაუგებელი სერიის შეწყვეტა დასჭირდებათ.