ისტორიაში მეორე - ჯოკოვიჩმა AO-ზე მე-100 მატჩი მოიგო

ნოვაკ ჯოკოვიჩმა ავსტრალიის ღია პირველობაზე კარიერაში მე-100 მატჩი მოიგო. ესპანელი პედრო მარტინესი 3 სეტში დაამარცხა - 6:3; 6:2; 6:2.

სერბი ვარსკვლავი ისტორიაში მეორეა, ვინც AO-ზე 100-მოგებიან ნიშნულს მიაღწია - როჯერ ფედერერს 102 გამარჯვება აქვს.

ასევე, ჯოკოვიჩი პირველია, ვინც მინიმუმ 100 თამაშის მოგება 3 სხვადასხვა დიდი სლემის ტურნირზე შეძლო - ავსტრალიის ღია პირველობა (100), როლან გაროსი (101) და უიმბლდონი (102).

ისტორიაში სულ 6 ჩოგბურთელია, ვინც დიდი სლემის ტურნირებზე მინიმუმ 100 მატჩი მოიგო:

ნოვაკ ჯოკოვიჩი - უიმბლდონი (102); როლან გაროსი (101), ავსტრალიის ღია პირველობა (100);

როჯერ ფედერერი - უიმბლდონი (105), ავსტრალიის ღია პირველობა (102);

მარტინა ნავრატილოვა - უიმბლდონი (120);

რაფაელ ნადალი - როლან გაროსი (112);

სერენა უილიამსი - ამერიკის ღია პირველობა (108);

კრის ევერტი - ამერიკის ღია პირველობა (101).

ჯოკოვიჩს წელსვე შეუძლია, გახდეს ისტორიაში პირველი ჩოგბურთელი, ვინც დიდი სლემის 4-ვე ტურნირზე 100 თამაშს მოიგებს - ამერიკის ღია პირველობაზე 95 გამარჯვება აქვს.

ნოლეს კარიერაში დიდი სლემის 24 ტიტული აქვს მოგებული (მათგან 10 სწორედ ავსტრალიის ღია პირველობაზე), რაც მამაკაცთა შორის რეკორდია, ზოგადად ჩოგბურთის ისტორიაში კი თანარეკორდი - ავსტრალიელ მარგარეტ კორტს ასევე 24 ტიტული აქვს.

სერბი AUS Open-ის მომდევნო წრეში მსოფლიოს 141-ე ჩოგან იტალიელ ფრანჩესკო მაესტრელის შეხვდება.