იტალიის ფეხბურთის ფედერაციამ კრიზისიდან გამოსავალი იპოვა - ეროვნულ ნაკრებს კვლავ ანტონიო კონტე უხელმძღვანელებს.
იუვენტუსის, ჩელსისა და ნაპოლის ყოფილი მწვრთნელი ნაკრებში გრძელვადიანი პროექტით მოდის და La Gazzetta dello Sport-ის ინფორმაციით, ის 4-წლიან კონტრაქტს გააფორმებს, რომელიც 2030 წლის მსოფლიო ჩემპიონატის დასრულებამდე იქნება ძალაში.
ფედერაციამ ეს გადაწყვეტილება მას შემდეგ მიიღო, რაც იტალიამ ბოსნია-ჰერცეგოვინასთან წააგო და ზედიზედ მესამე მუნდიალი გამოტოვა. კონტეს დანიშვნას სერია ა-ს წამყვანი კლუბებიც მიესალმებიან, რადგან მისი დისციპლინა და მიდგომები მთელი იტალიური ფეხბურთისთვის გარანტიად მიაჩნიათ.
56 წლის სპეციალისტმა ნაკრებში მუშაობისთვის გზა მას შემდეგ გაითავისუფლა, რაც ნაპოლიდან წამოვიდა. მიუხედავად იმისა, რომ მან ნეაპოლელებს სკუდეტო და სუპერთასი მოაგებინა, კლუბის ხელმძღვანელობასთან კონტრაქტი ორმხრივი შეთანხმებით გაწყვიტა, რადგან ჩათვალა, რომ იქ მისი მისია დასრულდა. ახლა კონტეს მთავარი მიზანი იტალიის ნაკრებისთვის ძველი დიდებისა და იდენტობის დაბრუნებაა.
