ჩელსის ლეგენდარულმა მცველმა, ჯონ ტერიმ, იმედგაცრუება გამოხატა იმის გამო, რომ ენცო მარესკას გათავისუფლების შემდეგ, გუნდის სამწვრთნელო შტაბში დროებითაც კი არ შეიყვანეს.
შეგახსენებთ, რომ ლიამ როსენიორის დანიშვნამდე ჩელსის სათავეში ახალგაზრდული გუნდის მწვრთნელი, კალუმ მაკფარლეინი ედგა. ტერიმ არხ Golf Life-თან ინტერვიუში ამ თემაზე გულახდილად ისაუბრა:
„იმდენად გაბრაზებული არ ვარ, რამდენადაც ნაწყენი, რადგან მე ახალგაზრდული გუნდის ნაწილი ვიყავი. კალუმ მაკფარლეინმა ჩაიბარა გუნდი, თავი ძალიან კარგად წარმოაჩინა და შედეგებსაც მიაღწია. ვფიქრობ, მეც ამ ყველაფრის ნაწილი უნდა ვყოფილიყავი.
ადამიანებმა გადაწყვეტილებები უნდა მიიღონ. მე მიყვარს, როცა ხალხი პირდაპირ ამბობს „კი“ ან „არა“. აშკარაა, რომ ხელმძღვანელობამ, ან მათ, ვინც ამ გადაწყვეტილებებს იღებს — ალბათ სპორტულმა დირექტორებმა — მითხრეს „არა“ და არ ამირჩიეს. რა იყო ამის მიზეზი, არ ვიცი“.
