"კარლო მამაც იყო და დედაც" - კატია ანჩელოტი მამაზე

კარლო ანჩელოტის შვილმა, კატია ანჩელოტიმ ესპანურ El Mundo-სთან ინტერვიუში მამის შესახებ ისაუბრა და ბავშვობის წლები გაიხსენა.

"კარლო მამაც იყო და დედაც, სახლში მისი ყოფნა ყოველთვის იგრძნობოდა. დედა, რომელიც სამწუხაროდ აღარ არის ჩვენთან, ყოველთვის წასული იყო. ის ასევე თამაშობდა ფეხბურთს, შემდეგ სოფტბოლს, ინტერესებით სავსე ქალი იყო. ის არ იყო ტიპიური დედა, რომელსაც სამზარეულოში ხედავთ, საჭმელს ამზადებს ან საყიდლებზე ღელავს.

ოჯახური შობის სუფრასთან გატარებული დღესასწაულების შესახებ ოჯახური მოგონებები არ მაქვს. მაშინ ვფიქრობდი, რომ დედა არასწორი იყო, მას უცნაურად და ძალიან შორეულად აღვიქვამდი. თუმცა, როდესაც გავიზარდე, მისი გაცნობა და გაგება შევძელი. დამოუკიდებლობა ისეთივე ღირებულებაა, როგორც თავისუფლება, ეს მოგვიანებით მივხვდი.

ჩვენი შობა მილანელოში იყო, მშვენიერი ოჯახი ვიყავით, დაუვიწყარი მოგონებებით", - თქვა კატიამ, რომელიც 1984 წელსაა დაბადებული და თავის ძმა დავიდეზე 5 წლით უფროსია.

დედა, ვისზეც კატია საუბრობს, კარლო ანჩელოტის პირველი მეუღლე, ლუიზა გიბელინია. კარლო და ის ერთად 25 წლის განმავლობაში (1983-2008) იყვნენ. გიბელინი მაისში, 63 წლის ასაკში, ხანგრძლივი ავადმყოფობის შემდეგ გარდაიცვალა.