კევინ ჰოლანდი - ერთ-ერთი ყველაზე აქტიური მებრძოლი UFC-ში

6 ოქტომბერს UFC 307-ზე რომან დოლიძე კევინ ჰოლანდს დაუპირისპირდება. 

ჰოლანდი 31 წლის ამერიკელი მებრძოლია, რომელიც UFC-ში ერთ-ერთი ყველაზე აქტიური ათლეტია, ამაზე მისი ბრძოლების რაოდენობა მიუთითებს. მისი MMA რეკორდი 26-11-0 არის. 22 ბრძოლა კი მას UFC-ში აქვს ჩატარებული.

ჰოლანდის დებიუტი UFC-ში 2018 წელს საშუალო წონაში შედგა. ის ტიაგო სანტოსთან 3-რაუნდიან დაპირისპირებაში გადაწყვეტილებით დამარცხდა. შემდეგ ბრძოლაში ის ჯონ ფილიპს დაუპირისპირდა და მე-3 რაუნდში საბმიშენით მოუგო.

2019 წელს ჰოლანდმა 3 ბრძოლა ჩაატარა. ჯერალდ მირსჩარტსა და ალესი დი ჩირიკოს ამერიკელმა გადაწყვეტილებებით სძლია, წლის მე-3 დაპირისპირებაში კი ბრენდან ალენთან საბიმშენით წააგო.

ყველაზე აქტიური და წარმატებული კევინისთვის 2020 წელი აღმოჩნდა. მან მაისიდან დეკემბრის ჩათვლით 5 ბრძოლა ჩაატარა და ხუთივე მოიგო, თანაც აქედან 4 დროზე ადრე. ჰოლანდმა ნოკაუტით/ტექნიკური ნოკაუტით ენტონი ერნანდესს, ხოაკინ ბაკლისა და რონალდო სოუზას სძლია, გადაწყვეტილებით აჯობა დარენ სტიუარტს, ჩარლი ონტივეროსს კი საბმიშენით მოუგო.

2020 წლისგან განსხვავებით ჰოლანდისთვის 2021 წელი წარუმატებელი გამოვიდა. მან 3 ბრძოლა ჩაატარა და საიდანაც ორში მთავარ ბრძოლაში იასპარეზა და ერთხელაც Co-main ბრძოლაში, თუმცა ვერცერთი მოიგო. დერეკ ბრანსონთან და მარვინ ვეტორისთან კევინი 5-რაუნდიან დაპირისპირებებში გადაწყვეტილებით დამარცხდა, კაილ დაუკაუსთან კი ფრე დაფიქსირდა.

2022 წელს ამერიკელმა წონა შეიცვალა და ქვესაშუალო წონაში გამარჯვების გზას დაუბრუნდა, მან ზედიზედ 2 ბრძოლაში ვადაზე ადრე იმარჯვა. კევინმა ჯერ ალექს ოლივეირა დაამარცხა შემდეგ კი ტიმ მინს აჯობა საბმიშენით. ამავე წელს ჰოლანდმა კიდევ 2 ბრძოლა მოასწრო, თუმცა ორივეში წააგო. მას ჯერ ხამზატ ჩიმაევმა აჯობა საბმიშენით, შემდეგ კი სტივენ ტომპსონმა დაუმთავრა ბრძოლა დროზე ადრე. 

2023 წელს ჰოლანდმა 3 ბრძოლა ჩაატარა, საიდანაც 2 მოიგო. მან სანტიაო პონსინიბიო და მაიკლ კიეზას დაუმთავრა ვადაზე ადრე, თუმცა მე-3 ბრძოლაში ჯეკ დელა მადალენასთან გადაწყვეტილებით წააგო.

2024 წელს რომან დოლიძესთან ბრძოლა ამერიკელისთვის რიგით მე-3 იქნება. მარტში მას მაიკლ პეიჯმა გადაწყვეტილებით აჯობა, ივნისში კი ის საშუალო წონას დაუბრუნდა და მიხალ ოლექსიეჩუკს პირველ რაუნდში საბმიშენით მოუგო.

UFC-ში ჩატარებული 22 ბრძოლიდან კევინ ჰოლანდმა 13 მოიგო, 8 წააგო და 1 ფრედ დაასრულა. ამერიკელი ამ მომენტისთვის ქვესაშუალო წონის რეიტინგის მე-15 მებრძოლია, საშუალო წონაში კი რეიტინგში არ არის.

ვიდეო: დოლიძისა და ჰოლანდის პირველი პირისპირ დგომი