ხელბურთი - საქართველოს ნაკრების ახალი მწვრთნელი წარადგინეს

საქართველოს ხელბურთის ნაკრების მთავარი მწვრთნელის პოსტზე რუბენ გარაბაია დღეს წარადგინეს.

47 წლის ესპანელი სპეციალისტი ხელბურთის ფედერაციის პრეზიდენტმა, ვახტანგ მეიფარიანმა და ვიცე-პრეზიდენტმა, ლევან სალუქვაძემ მედიის წინაშე წარადგინეს და პრესკონფერენცია გამართეს.

"ბედნიერი ვარ, რომ შევუერთდი გუნდს, რომელიც ბოლო წლებში საგრძნობლად გაიზარდა და მნიშვნელოვან წარმატებებს მიაღწია. მე და ჩემი სამწვრთნელო შტაბი დარწმუნებულები ვართ, რომ მის შემდგომ განვითარებაში დიდ წვლილს შევიტანთ. არ დავიშურებთ ძალისხმევასა და გამოცდილებას, რათა სათამაშო სტილი გავაუმჯობესოთ და ევროპისა და მსოფლიო ჩემპიონატებზე სტაბილურად გავიდეთ.

რა თქმა უნდა, ჩემი უმთავრესი საზრუნავი ეროვნული ნაკრებია, თუმცა მწვრთნელებისთვის ერთობლივ პროგრამასაც შევიმუშავებთ. საბოლოო მიზანი კი ისაა, რომ გულშემატკივარი ნაკრების თამაშითა და შედეგებით კმაყოფილი იყოს", - აღნიშნა გარაბაიამ.

რუბენ გარაბაია ბოლოს ჩრდილოეთ მაკედონიურ პერისტერს წვრთნიდა. აქტიური სახელბურთო კარიერისას კი, ესპანეთის ნაკრებთან ერთად, მსოფლიო ჩემპიონატზე - ოქროსა (2005) და ბრინჯაოს (2011), ევროპის ჩემპიონატზე - ვერცხლის (2006), ხოლო ოლიმპიურ თამაშებზე ასევე ბრინჯაოს მედალი (2008) აქვს მოპოვებული.

გარაბაია პოსტზე ჩაანაცვლებს ტიტე კალანდაძეს, რომელიც ჩვენს გუნდს ისტორიულ ტურნირებზე გაუძღვა - 2024-ის, საქართველოსთვის სადებიუტო, ევროპის ჩემპიონატსა და 2026-ის ასევე ევროპის ჩემპიონატზე.