ლა ლიგის პრეზიდენტმა, ხავიერ ტებასმა ოფიციალურად დაადასტურა, რომ მომავალი სეზონიდან მსაჯობის სისტემაში ხელოვნური ინტელექტი (AI) აქტიურად იქნება ინტეგრირებული.
ტებასის განცხადებით, ახალი ტექნოლოგია ორ ძირითად მიმართულებაზე იქნება პასუხისმგებელი:
1. არბიტრების ობიექტური შეფასება
ამჟამად მატჩის დასრულების შემდეგ მსაჯთა ტექნიკური კომიტეტის (CTA) სპეციალური შემფასებლები არბიტრებს 30 სხვადასხვა კრიტერიუმით აფასებენ, რაც სრულად მექანიკურად და ადამიანური რესურსით კეთდება (20 მსაჯზე 30 შემფასებელი). მომავალი სეზონიდან კი ამ პროცესში ხელოვნური ინტელექტი ჩაერთვება. ტებასმა განაცხადა:
ჩვენ ვქმნით სპეციალურ ხელსაწყოს, რომლის წყალობითაც მსაჯის საბოლოო შეფასების მინიმუმ 40%-ს ხელოვნური ინტელექტი აბსოლუტურად ობიექტურად განსაზღვრავს. პროგრამა ყველა მატჩის მონაცემების საფუძველზე მუშავდება და სპეციალურ ალგორითმებს აგენერირებს. AI დეტალურად გადახედავს თამაშს და ზუსტად მიგვითითებს, თუ სად მიიღო მსაჯმა სწორი გადაწყვეტილება. ჩვენ ეს პროცესი მაქსიმალურად ობიექტური უნდა გავხადოთ.
2. მატჩებზე მსაჯების დანიშვნა
მეორე უმნიშვნელოვანესი ფუნქცია, რასაც ხელოვნური ინტელექტი შეითვისებს, უშუალოდ თამაშებზე მსაჯების გადანაწილებაა. ტექნოლოგია დაგროვებული მონაცემების გაანალიზებით სპეციალურ კომიტეტს კონკრეტული მატჩისთვის 3 საუკეთესო პოტენციურ არბიტრს შესთავაზებს, საიდანაც საბოლოო არჩევანი გაკეთდება:
მე მჯერა ადამიანური ინტუიციისა და განსჯის უნარის, თუმცა არსებობს სფეროები და კომპონენტები, სადაც ხელოვნური ინტელექტი აუცილებლად უნდა დაგვეხმაროს.
