ესპანიოლის მწვრთნელს, მანოლო გონსალესს ეჭვი ეპარება, რომ გუნდის გოლკიპერი ჟოან გარსია ბარსელონაში გადავა, რომელიც მისით ინტერესდება.
იწერება, რომ ბლაუგრანას გარსიას 25-30 მილიონად შეძენა და რომელიმე გუნდში განათხოვრება აქვს გეგმად.
„შეიძლება ის უკვე გაყიდეს კიდეც, მაგრამ ჩემთვის ჯერ არაფერი უთქვამთ. პირადად მე ძალიან ეჭვი მეპარება, რომ ის ბარსაში გადავიდეს. ხელს მოვიჭრითქო ვერ ვიტყვი, მაგრამ თითქმის.
ჯერ კიდევ ახალგაზრდული გუნდებიდან მიმაჩნდა ის ტოპ დონის მეკარედ. ვფიქრობ, მას შეუძლია მსოფლიოში ერთ-ერთი საუკეთესოც გახდეს. იმ ფასად, რაც ის ღირს, ბევრს არც ვიფიქრებდი, მისი შეძენა რომ შემეძლოს.
მე პირადად ბარსა არასდროს არ მომწონდა." - აღნიშნა მანოლო გონსალესმა და დაამატა, რომ ბავშვობაში თავადაც ჰქონდა ბარსელონაში გადასვლის შესაძლებლობა, თუმცა ეს არ გააკეთა.
