ოფიციალურად, ტრენტ ალექსანდრ არნოლდს ლივერპულთან კონტრაქტი ამოეწურა და თავისუფალი აგენტის სტატუსით, უფასოდ შეუერთდა მადრიდის რეალს.
თუმცა, სამეფო კლუბს ლივერპულისთვის 10 მილიონი ევროს გადახდა მაინც მოუწია - ჩნდება კითხვა, რაში?
პასუხი კი ძალიან მარტივია - ტრენტს ლივერპულთან კონტრაქტი 30 ივნისამდე აკავშირებდა, რეალთან ხელშეკრულება კი 1 ივლისიდან შევიდოდა ძალაში. თუმცა, გამომდინარე იქიდან, რომ მადრიდელებს ტრენტის მსოფლიო საკლუბო ჩემპიონატზე გამოყენება სურთ, რომელიც 14 ივნისს იწყება, მერსისაიდელებისთვის ფულის გადახდა მოუწიათ.
კლუბები მოლაპარაკებებს საკმაოდ დიდი ხნის მანძილზე აწარმოებდნენ, რამაც რეალში ფეხბურთელის ტრანსფერის დადასტურებაც გააჭიანურა. ლივერპულმა დროზე ადრე ტრენტის გაშვება უფასოდ იუარა და საბოლოოდ, რეალი 10 მილიონი ევროს გადახდას დათანხმდა, რათა ინგლისელი 1 თვით ადრე დაერეგისტრირებინა.
10 მილიონი ევროს გარდა, რეალი ლივერპულის ნაცვლად ფეხბურთელს ივნისის ხელფასსაც გადაუხდის.
სამეფო კლუბისთვის მსოფლიო საკლუბო ჩემპიონატი 18 ივნისს, ალ ჰილალთან მატჩით იწყება, რომელშიც ტრენტის გარდა შედგება ჩაბი ალონსოს, დინ ჰაუსენის და რეალის შესაძლო სხვა ახალწვეულების დებიუტიც.
