კლოპმა გერმანიის ნაკრებში ერა გადადგომის მუქარით დაიწყო

იურგენ კლოპმა გერმანიის ეროვნულ ნაკრებში მუშაობა გადადგომის მუქარით დაიწყო და პრესას ოჯახის პირადი სივრცის ხელშეუხებლობა მოსთხოვა.

ლივერპულის ყოფილი მწვრთნელი პარასკევს გერმანიის ნაკრების თავკაცად ოთხწლიანი კონტრაქტით დაინიშნა. მან ამ პოსტზე იულიან ნაგელსმანი შეცვალა, რომელიც მსოფლიო ჩემპიონატის მეთექვსმეტედფინალში პარაგვაისთან შოკისმომგვრელი მარცხის შემდეგ გადადგა. 59 წლის სპეციალისტმა პირველივე პრესკონფერენციაზე მედია მკაცრად გააფრთხილა.

თუ ცუდად მოიქცევით და ჩემს ოჯახს მოსვენებას არ მისცემთ, მე წავალ. უბრალოდ მოვბრუნდები და წავალ. ვიცი, რომ სხვა ქვეყნებში ეროვნული ნაკრების მწვრთნელებს კიდევ უფრო უარესად ექცევიან. ეს სამსახური მიყვარს, მაგრამ საჭიროების შემთხვევაში ნებისმიერ წამს მზად ვარ, ყველაფერი მივატოვო

კლოპის დანიშვნას გულშემატკივრები კვირების განმავლობაში ელოდნენ. მისი კონტრაქტი 2030 წლის მსოფლიო ჩემპიონატის ჩათვლით იქნება ძალაში, რომელსაც ესპანეთი, პორტუგალია და მაროკო უმასპინძლებენ. სპეციალისტის თქმით, სანაკრებო კარიერის შემდეგ ის მწვრთნელობას აღარ აპირებს, რადგან ეს მისთვის პროფესიული მწვერვალია და ამ საქმეში ბოლომდე დაიხარჯება.

,,ვნახე, როგორ ექცეოდით ნაგელსმანს" - კლოპის პირველი პრესკონფერენცია

ეს კლოპის პირველი სამუშაოა მას შემდეგ, რაც 2024 წლის ზაფხულში ენერგიის ამოწურვის გამო ლივერპული დატოვა. მწვრთნელის განცხადებით, სანაკრებო ფეხბურთში მოსასვლელად ახლა იდეალური დროა. გერმანელის სადებიუტო მატჩი 24 სექტემბერს, ერთა ლიგის ჯგუფურ ეტაპზე ნიდერლანდების წინააღმდეგ გაიმართება.