კვერნაძე თუ ენდრიკი? - რომელს ირჩევს რომა?

იტალიური სპორტული მედიის ცნობით, რომამ ზამთრის სატრანსფერო ფანჯრისთვის ახალი სამიზნე შეარჩია.

კლუბი ფროზინონეს 23 წლის ქართველი შემტევის, გიორგი კვერნაძის შეძენით დაინტერესდა.

Gazzetta dello Sport-ზე დაყრდნობით იწერება, რომ ჯან პიერო გასპერინის შეტევის ხაზის გაძლიერება სურს, რადგან პაულო დიბალასა და მანუ კონეს ტრავმებმა გუნდის შედეგებზე უკვე იქონია გავლენა.

თუ ზაფხულში რომას მთავარი სამიზნე მადრიდის რეალის ბრაზილიელი ტალანტი ენდრიკი იყო, ახლა იტალიური გრანდი იანვრის იდეალურ შენაძენად სწორედ კვერნაძეს განიხილავს.

საქართველოს ნაკრების გარემარბი სერია ა-ში სადებიუტო სრულფასოვან სეზონს შესანიშნავად ატარებს. 11 ჩატარებულ შეხვედრაში მის ანგარიშზე უკვე 3 გოლი და 4 საგოლე გადაცემაა.

ქართველი ფეხბურთელის ლიდერობით ფროზინონე სატურნირო ცხრილში მე-6 ადგილზე იმყოფება და ისეთ გრანდებს უსწრებს, როგორებიც იუვენტუსი და ნაპოლი არიან.

აღსანიშნავია, რომ რომაელებს ქართველი ფეხბურთელისთვის ბრძოლაში სერიოზული კონკურენციის დაძლევა მოუწევთ. იტალიელი ინსაიდერის, ნიკოლო სკირას ინფორმაციით, კვერნაძის მიმართ ინტერესს ინგლისური კრისტალ პალასი და ფრანგული მონაკოც იჩენენ.

კვერნაძეს, რომელსაც იტალიაში ხშირად ახალ ხვიჩა კვარაცხელიასაც უწოდებენ, ფროზინონესთან კონტრაქტი 2028 წლამდე აკავშირებს. ხელშეკრულებაში ჩადებული პუნქტის თანახმად, 2027 წლის ივლისიდან მისი გამოსასყიდი თანხა 4 მილიონი ევრო გახდება, რაც ფროზინონეს დამატებით მოტივაციას აძლევს, რომ ფეხბურთელი სარფიანად სწორედ მიმდინარე ზამთარში გაყიდოს.