ლეგენდარული მირჩა ლუჩესკუ გარდაიცვალა

მირჩა ლუჩესკუ 80 წლის ასაკში გარდაიცვალა.

ლეგენდარულმა მწვრთნელმა ვერ შეძლო ცოტა ხნის წინ გადატანილი გულის შეტევა გადაელახა, რომელიც კლინიკაში დაემართა.

პირველი პრობლემები მას შემდეგ დაიწყო, რაც რუმინეთის ეროვნული ნაკრების შეკრების დროს თავი ცუდად იგრძნო. „ილ ლუჩე“ საავადმყოფოში გადაიყვანეს, სადაც 3 აპრილს, გულის შეტევა გადაიტანა და მას შემდეგ ვერ გამოჯანმრთელდა.

მირჩა ლუჩესკუ გარდაიცვალა სულ რამდენიმე დღეში მას შემდეგ, რაც მან რუმინეთის ეროვნული ნაკრების მწვრთნელის პოსტზე თავისი მეორე ვადა დაასრულა.

მან ეროვნული გუნდი მას შემდეგ დატოვა, რაც 2026 წლის მსოფლიო ჩემპიონატზე გასვლა თურქეთთან წაგებული მატჩის შემდეგ ვერ შეძლო. ლუჩესკუ რუმინეთის ნაკრების მწვრთნელად 2024 წლის აგვისტოში დაინიშნა.

მირჩა ლუჩესკუ - წარმატებით შემკული კარიერა

მირჩა ლუჩესკუ მსოფლიო ფეხბურთის ერთ-ერთ ლეგენდარულ მწვრთნელად იქცა. კარიერის განმავლობაში „ილ ლუჩემ“ 37 ტიტული მოიგო, რის შედეგადაც იგი ისტორიაში ტიტულების რაოდენობით მე-3 ადგილზეა სერ ალექს ფერგიუსონისა და პეპ გვარდიოლას შემდეგ.

ლუჩესკუს კარიერის მნიშვნელოვანი ეტაპები დონეცკის შახტარს უკავშირდება - გუნდი, რომელიც მან სრულიად გარდაქმნა და რომელთან ერთადაც 8-ჯერ მოიგო უკრაინის ჩემპიონატი, ასევე 2009 წელს უეფას თასი.

გარდა ამისა, ლუჩესკუ მნიშვნელოვანი ფიგურა იყო თურქულ ფეხბურთშიც, სადაც მან ჩემპიონატი გალათასარაისა და ბეშიქთაშთან ერთად მოიგო, ხოლო გალათასარაისთან ერთად 2000 წელს უეფას სუპერთასიც მოიპოვა.

რუმინეთში მირჩამ ჩემპიონატის ტიტული ორ სხვადასხვა გუნდთან - დინამოსა და რაპიდთან ერთად მოიგო.

მის სამწვრთნელო კარიერაში „ილ ლუჩე“ წვრთნიდა ისეთ გუნდებს, როგორებიცაა: კორვინული, დინამო, პიზა, ბრეშა, რეჯიანა, რაპიდი, ინტერი, გალათასარაი, ბეშიქთაში, შახტარი, ზენიტი, დინამო კიევი და თურქეთის ეროვნული ნაკრები.

მირჩა ლუჩესკუს პირველი პერიოდი რუმინეთის ეროვნული ნაკრების მწვრთნელის პოსტზე, რომელიც 1980-იანების დასაწყისში შედგა, რჩება რუმინული ფეხბურთის ისტორიულ ეტაპად: მისი ხელმძღვანელობით რუმინეთი 1984 წლის ევროპის ჩემპიონატზ გავიდაე, რაც მათი პირველი გამოჩენა იყო ევროპის ფინალურ ტურნირზე.