საქართველოს ჩემპიონატში დაფიქსირებულმა შედეგმა საჩემპიონო ბრძოლა კიდევ უფრო დაძაბა.
ეროვნული ლიგის 32-ე ტურში სატურნირო ცხრილის ლიდერი დინამო ბათუმი თბილისში სპაერს დაუპირისპირდა.
შეხვედრის პირველ ტაიმში მხოლოდ 1 გოლი გავიდა, თუმცა საბოლოოდ მატჩი უხვგოლიანი გამოდგა.
მე-11 წუთზე ანგარიში უერდი მარამ გახსნა და სტუმრებს ტაიმი მოაგებინა, თუმცა მეორე ნახევრის სტარტზე მასპინძლებმა თამაშის მოტრიალება შეძლეს.
48-ე წუთზე გიგა სამხარაძემ პენალტის საშუალებით ანგარიში გაათანაბრა, 52-ე წუთზე კი გოჩა ცირდავამ სპაერი წინ გაიყვანა.
69-ე წუთზე თორნიკე ასკურავამ ცენტრიდან საოცარი გოლი გაიტანა და თბილისელთა უპირატესობა ორბურთიანი გახადა.
90-ე წუთზე კი გიორგი ბუნტურის ავტოგოლით საბოლოო ანგარიში (3-2) დაფიქსირდა და დინამო ბათუმმა საჩემპიონო ბრძოლაში მნიშვნელოვანი ქულები დაკარგა.
ამ მატჩის შემდეგ გიორგი ჭიაბრიშვილის გუნდს 59 ქულა აქვს და სატურნირო ცხრილს კვლავ ლიდერობს, თუმცა ორშაბათს იბერია 1999-ს თავისი მატჩი გაგრასთან აქვს ჩასატარებელი, გამარჯვების შემთხვევაში კი ლევან კორღალიძის გუნდი დინამოს გაუთანაბრდება და ურთიერთშეხვედრებში უპირატესობის გამო ცხრილში პირველ ადგილს დაიკავებს.
თავისი მატჩი მოიგო ოთხეულის კიდევ ერთმა გუნდმა რუსთავმაც, რომელმაც სამგურალი 2-0 დაამარცხა და ცხრილში 56 ქულით სწორედ იბერიას გაუთანაბრდა.
ხვალ თავის შეხვედრას გამართავს დინამო თბილისიც, რომელსაც 55 ქულა აქვს და გასვლაზე გორის დილას დაუპირისპირდება.
