საფრანგეთის დედაქალაქ პარიზში მიმდინარე გრან სლემის დროს, ძიუდოს საერთაშორისო ფედერაციამ სხვადასხვა ნომინაციაში 2025 წლის საუკეთესოები გამოავლინა.
თითოეულ კატეგორიაში სამი საუკეთესო ნომინანტი საზოგადოების ხმებმა გამოავლინა, რის შემდეგაც საერთაშორისო ექსპერტთა პანელმა საბოლოო გამარჯვებული დაასახელა.
წლის საუკეთესო მომენტად ეთერ ლიპარტელიანის ბუდაპეშტური ტრიუმფი დასახელდა, სადაც ის პირველი ქართველი ქალი მსოფლიო ჩემპიონი გახდა.
წლის სამწვრთნელო მიღწევად საქართველოს მწვრთნელთა გუნდის შედეგი აღიარეს, რომელთა გაწვრთნილმა ნაკრებმაც 12-წლიანი ლოდინის შემდეგ გუნდური მსოფლიო ჩემპიონობა მოიპოვა.
წლის ქალი ძიუდოისტი კი ეთერ ლიპარტელიანი გახდა, რომელმაც ამ ნომინაციაში იაპონელი უტა აბე და იტალიელი ალის ბელანდი დაამარცხა.
