ლივერპული პსჟ-ს ვარსკვლავს უმიზნებს?

ფრანგული გამოცემა L'Equipe-ის ცნობით, ლივერპულმა პარი სენ-ჟერმენს ბრედლი ბარკოლას სანაცვლოდ 115 მილიონი ევრო შესთავაზა.

სატრანსფერო ფანჯრის დახურვამდე სულ რაღაც სამი კვირით ადრე, მერსისაიდულმა კლუბმა პირდაპირ შეტევაზე გადასვლა არჩია.

გავრცელებული ინფორმაციით, პსჟ ამ შეთავაზების უარყოფას აპირებს. აქამდე პარიზელები აცხადებდნენ, რომ ფრანგი ვინგერი არ იყიდებოდა, თუმცა მას შემდეგ, რაც 23 წლის ფეხბურთელმა 2028 წელს ამოწურვადი კონტრაქტის გახანგრძლივებაზე უარი თქვა, კლუბმა პოზიცია შეცვალა და მის სანაცვლოდ ახლა უკვე მინიმუმ 150 მილიონ ევროს ითხოვს. ეს გადაწყვეტილება სრულად ემთხვევა ალ-ხელაიფის, კამპოსისა და ლუის ენრიკეს მთავარ ფილოსოფიას, არ გააჩერონ გუნდში ისეთი მოთამაშე, რომელსაც წასვლა სურს.

ლივერპულის ეს გრანდიოზული შეთავაზება ორ მთავარ გზავნილს ატარებს: პირველი, პარიზელებს უმტკიცებს, რომ ინგლისელების ინტერესი რეალურია; მეორე კი მიმართულია უშუალოდ ფეხბურთელისკენ, რათა დაარწმუნონ კლუბის სერიოზულ განზრახვაში. აღსანიშნავია, რომ ბარკოლა ლივერპულთან პირად კონტრაქტზე პრინციპულად უკვე შეთანხმებულია.