ლუის ენრიკე პრემიერ ლიგაში? მანჩესტერ იუნაიტედი ესპანელით ინტერესდება

მანჩესტერ იუნაიტედში სამწვრთნელო საკითხი კვლავ აქტუალურია.

მას შემდეგ, რაც იანვარში რუბენ ამორიმი პოსტიდან დაითხოვეს, გუნდს დროებით მაიკლ კერიკი ხელმძღვანელობს. წითელი ეშმაკების ყოფილი ნახევარმცველის მუშაობა კი იმდენად შთამბეჭდავი აღმოჩნდა, რომ მისი მუდმივ მწვრთნელად დანიშვნის შანსები საგრძნობლად გაიზარდა.

კერიკის ხელში მანჩესტერ იუნაიტედმა 10 მატჩიდან 7 მოიგო, 2 ფრედ დაასრულა და მხოლოდ ერთი წააგო. Sky Sports-ის ინფორმაციით, კერიკისთვის დამატებითი ბუსტია ის გარემოება, რომ კლუბის ხელმძღვანელობას სხვა კანდიდატებთან მოლაპარაკებები ჯერ არ დაუწყია. გარდა ამისა, პოტენციური კანდიდატების სია შემცირდა: თომას ტუხელმა ინგლისის ნაკრებთან კონტრაქტი გაახანგრძლივა, კარლო ანჩელოტი კი ბრაზილიის ნაკრებში დარჩენას გეგმავს.

პარალელურად, ვრცელდება ინფორმაცია პსჟ-ს თავკაცის, ლუის ენრიკეს შესახებ. The Independent იუწყება, რომ მანჩესტერული კლუბი ესპანელი სპეციალისტის კანდიდატურას სერიოზულად განიხილავს და მზად არის, ზაფხულში მის გადმოსაბირებლად მაქსიმუმი გააკეთოს. ენრიკეს დიდი ხანია პრემიერ ლიგაში მუშაობის სურვილი აქვს და მოსალოდნელია, რომ ის პარიზს სეზონის ბოლოს დატოვებს.

გუნდის ლეგენდა, გარი პალისტერი მიიჩნევს, რომ კერიკმა მოკლე დროში საოცარი სამუშაო გასწია:

მაიკლმა დააბრუნა ოთხმცველიანი ტაქტიკა და შემადგენლობაში კობი მაინუ დააბრუნა, რომელიც მანამდე დავიწყებული ჰქონდათ. მან გუნდს პოზიტიური განწყობა და თავისუფლება შესძინა. იუნაიტედის ისტორია და ტრადიციები მან კარგად იცის, რადგან აქ დიდი ტიტულები აქვს მოგებული. მეტს მისგან ვერც ვერავინ მოითხოვდა.

კლუბის ხელმძღვანელობა ჯერჯერობით ინარჩუნებს სიმშვიდეს და გადამწყვეტ ნაბიჯს მხოლოდ მაშინ გადადგამს, როცა საბოლოოდ დარწმუნდება, რომ კერიკი გრძელვადიან პერსპექტივაში გუნდისთვის საუკეთესო არჩევანია.