VIDEO: მანჩესტერის კვლავ განულებული მოგებათა სერია და ბორნმუთის ზედიზედ მე-5 ფრე ჩემპიონატში

პრემიერ ლიგის 31-ე ტურში მანჩესტერ იუნაიტედი სტუმრად ბორნმუთს დაუზავდა.

ვიტალიტი სტედიუმზე გამართული მატჩი ფრედ 2:2 დასრულდა.

უგოლო პირველი ნახევრის შემდეგ, ყველაფერი საინტერესო მეორე ნახევარში მოხდა. 

61-ე წუთზე საჯარიმოში კუნიას წაქცევისთვის მასპინძელთა კარში დანიშნული პენალტი გოლად ბრუნომ აქცია, თუმცა სულ რაღაც 6 წუთში მასპინძლებმა წონასწორობის აღდგენა მოახერხეს.

კიდევ ოთხი წუთის შემდეგ იუნაიტედმა გოლი კუთხურიდან გაიტანა — ბრუნოს ჩაწოდებას ჰილის ავტოგოლი მოჰყვა და მანჩესტერი წინ უკვე მეორედ გავიდა.

თუმცა, 78-ე წუთზე ჰარი მაგუაიერმა საკუთარ საჯარიმოში თამაშის წესები დაარღვია, რის გამოც პირდაპირი წითელი ბარათიც მიიღო აშკარა საგოლე შეტევის ჩაშლისთვის, სენე ლამენსის კარში კი პენალტი დაინიშნა, რომელიც კროუპიმ გოლად აქცია და იუნაიტედის გამარჯვებათა სერია, რომელიც ჯერ მხოლოდ ერთ მატჩს ითვლიდა, კვლავ განაულა.

იუნაიტედმა 55 ქულა დააგროვა და მე-3 ადგილს ინარჩუნებს, თუმცა ასტონ ვილას, რომელიც მე-4 ადგილზეა, სხვაობის 4-დან 2 ქულამდე შემცირების შანსი ლიდსთან მატჩში ექნება. ბორნმუთმა კი ჩემპიონატში ზედიზედ მე-5 ფრე ითამაშა და 42 ქულით მე-10 ადგილს იკავებს.

0-1 ბრუნო 61' (პენ)

1-1 ქრისტი 67'

1-2 ჰილი 71' (ავტოგოლი)

2-2 კროუპი 81' (პენ)