კარაგერი: „არსენალმა შეუძლებელი შეძლო — ნეიტრალური ქომაგები სიტისკენ არიან"

ჯეიმი კარაგერი მიიჩნევს, რომ სხვა გუნდების გულშემატკივრებს არსენალი არ უყვართ.

„არსენალმა ინგლისის თასის ფინალის წინ ისეთი რამ გააკეთა, რაც შეუძლებელი ჩანდა: მთელი ქვეყნის მასშტაბით ნეიტრალური ფანები აიძულა, მანჩესტერ სიტისთვის ეგულშემატკივრათ. საზოგადოებრივი აზრის ეს საინტერესო ცვლილება მხოლოდ უემბლიზე გამართული მატჩით არ შემოიფარგლება. იგივე ეხება — და კიდევ უფრო მეტადაც — პრემიერ ლიგის ტიტულისთვის ბრძოლას.

პეპ გვარდიოლა, სიტის თანამედროვე დომინაციის არქიტექტორი, ალბათ თავს პარალელურ სამყაროში გრძნობს. როდესაც არჩევანი უნდა გააკეთო სიტის — კლუბს, რომელიც აბუ-დაბის მიერ შესყიდვის შემდეგ დაუღალავად ივსებს ტიტულების კოლექციას და ჯერ კიდევ ელოდება ფინანსური წესების 115 სავარაუდო დარღვევის გამოძიების შედეგებს — და არსენალს შორის, რომელიც თავგამოდებით ცდილობს მრავალწლიანი უტიტულო სერიის დასრულებას, უმრავლესობა უკვე აღარ ამბობს: „ოღონდ სიტი არა და ვინც გინდა“. ამის ნაცვლად, გაბატონებული განწყობაა: „ოღონდ არსენალი არა და ვინც გინდა“.

ამის მიზეზები ტრაიბალიზმის, თვალთმაქცობისა და შექმნილი სიტუაციის ნაზავია. ინგლისური ფეხბურთის თითქმის ნებისმიერ სხვა ეპოქაში, ის, თუ როგორ გადააწყო მიკელ არტეტამ წარუმატებელი არსენალი და რამდენიმე მსხვილ ტიტულთან მიიყვანა, საყოველთაო აღფრთოვანებას გამოიწვევდა. ამის ნაცვლად, ახლა ფარული, მაგრამ შხამიანი კრიტიკა ჭარბობს.

მიზეზი, რის გამოც „სტილის პოლიცია“ ახლა უფრო ხმამაღლა ისმის, ვიდრე ოდესმე, ირონიულია, მაგრამ თავად გვარდიოლას წარმატებაში იმალება. 2019 წლიდან პრემიერ ლიგის მაყურებელი მიეჩვია, რომ ლიგას უფრო სუფთა, ლამაზი ფეხბურთი იგებს. ამჟამინდელი არსენალი კი უსაფუძვლოდ აღიქმება გუნდად, რომელიც ლიგას უკან, ძველი მიდგომებისკენ აბრუნებს — განსაკუთრებით სტანდარტულ მდგომარეობებზე აქცენტის გამო“, – დაწერა ლივერპულის ყოფილმა მცველმა.