ბენფიკას 20 წლის ვინგერმა, ჯანლუკა პრესტიანიმ, უეფას საგამოძიებო ჯგუფს ჩვენება მისცა.
საქმე ეხება ჩემპიონთა ლიგის მატჩში რეალის ვარსკვლავის, ვინისიუს ჟუნიორის მიმართ გამოთქმულ სავარაუდო რასისტულ შეურაცხყოფას.
შეგახსენებთ, რომ მადრიდულმა კლუბმა სწორედ ბრაზილიელის გოლით მოიგო (1:0), ვინისიუსმა კი არგენტინელი ფეხბურთელი იმაში დაადანაშაულა, რომ მან მას „მაიმუნი“ უწოდა. ინციდენტის დროს პრესტიანის პირი მაისურით ჰქონდა დაფარული, რამაც ტუჩების მოძრაობით სიტყვების ამოცნობა შეუძლებელი გახადა.
ფეხბურთელმა განმარტა, რომ ბრაზილიელს არა „მაიმუნი“ (mono), არამედ ჰომოფობიური შინაარსის სიტყვა — „პედერასტი“ (maricon) უწოდა.
ამ ყველაფერში საინტერესო კი ის არის, რომ ჰომოფობიური შეურაცხყოფა, ისევე, როგორც რასისტული, უეფას რეგლამენტით მინიმუმ 10-მატჩიანი დისკვალიფიკაციით ისჯება.
