მანჩესტერ იუნაიტედი მორიგი დიდი წმენდისთვის ემზადება - ზაფხულის სატრანსფერო ფანჯრისას გუნდს, შესაძლოა, 13-მდე ფეხბურთელმა დატოვოს, რაც კლუბისთვის მრავალმილიონიან ფინანსურ ზარალს ნიშნავს.
ოლდ ტრაფორდზე ეპოქის დასრულებაზე ალაპარაკდნენ. კლუბის მთავარი საფიქრალი არა მხოლოდ ახალი მოთამაშეების დამატება, არამედ ძვირადღირებული ფეხბურთელებისგან გათავისუფლება და ბალანსის აღდგენაა. Manchester Evening News-ის ინფორმაციით, წასასვლელთა სიაში ისეთი ვარსკვლავები მოხვდნენ, რომლებშიც გუნდმა წლების წინ კოლოსალური თანხები გადაიხადა.
მარკუს რაშფორდის შემთხვევაში, ბარსელონას მისი გამოსყიდვის უფლება დაახლოებით 26 მილიონ ფუნტად აქვს, რაც ინგლისური კლუბისთვის მის რეალურ ღირებულებასთან შედარებით ძალიან დაბალი ციფრია. კაზემირო, რომელიც 2022 წელს 60 მილიონ ფუნტად შეიძინეს, გუნდს ისე დატოვებს, რომ კლუბის სალაროში თითქმის არაფერს დატოვებს.
კიდევ უფრო მძიმეა რასმუს ჰოილუნის მდგომარეობა, რომელიც 72 მილიონი ფუნტი დაჯდა, ახლა კი ნაპოლიში 50 მილიონ ევროდ გადასვლასთანაა ახლოს. ჯეიდონ სანჩო კი, რომელშიც თავის დროზე 73 მილიონი ფუნტი გადაიხადეს, გუნდს სულაც უფასოდ დატოვებს. კითხვის ნიშნის ქვეშაა ანდრე ონანას, ჯოშუა პირკზესა და მანუელ უგარტეს მომავალიც.
ბოლო 10 წელიწადში გუნდმა მხოლოდ 6 ტიტული მოიგო, პრემიერლიგაში კი 2013 წლის შემდეგ არ უტრიუმფია. ამ პერიოდში მანჩესტერ იუნაიტედმა 9 მწვრთნელი გამოიცვალა, რაც კლუბში არსებულ სრულ ქაოსზე მეტყველებს.
კლუბის ხელმძღვანელობა იმედოვნებს, რომ ამ რადიკალური ნაბიჯებით მაინც მოახერხებენ ახალი, უფრო დაბალანსებული ეპოქის დაწყებას.
